| | உடன் பிறந்தாரியல்பு
|
| | குடும்பம் பேணாரைக் கொள்ளார் உயர்ந்தோர் |
| 106 | பயந்தவர் சோதரர் தமரைப் பண்பொடு
வியந்துபே ணாதவன் வேறு ளோர்களை
இயைந்துபே ணானென எண்ணி நீக்குவர்
உயர்ந்தவ ரவனொடும் உறவு தன்னையே.. |
|
| | பெற்றோர்களையும் உடன் பிறந்தார்களையும் உறவினர்களையும் அன்பொடு பேணாதவன், மற்றையோர்களை இணங்கிப் பேணமாட்டா னென்று கருதி உயர்ந்தோர் அவனுடன் உறவு கொள்ளுதலை நீக்குவர். |
| | பயந்தவர்-பெற்றோர், தாய்தந்தையர். தமர்-உறவினர். |
| | 3 |
| | ஒற்றுமைசேர் உடன்பிறப்பை ஒருவரும் வெல்லார். |
| 107 | ஒற்றையொண் சுடரினை யொழிக்கும் மெல்வளி
கற்றையாப் பலசுடர் கலப்பின் மாவளி
சற்றும்வெல் லாதுசூழ் தமர்ச கோதரர்
பற்றொடு மருவிடிற் படரு றார்களே. |
|
| | பலதிரியும் ஒன்றாகி எரியும் சுடரினைப் பெருங் காற்றாலும் அவிக்கமுடியாது. ஆனால் ஒருதிரியாய்த் தனித்து எரியின் சிறு காற்றும் அணைத்துவிடும். அதனால், ஒற்றுமையாயுள்ள உடன் பிறப்பாளர்களை எவரும் வெல்லக்கருதார் என்பது துணிபு. |
| | மெல் வளி-சிறு காற்று. |
| | 4 |
| | அமைஉடன் பிறப்பை வெல்லார் அனைவரும் |
| 108 | ஓரிழை யறுத்திடல் எளிதொன் றாகவே
சேரிழை பலவுறத் திரித்த தாம்பினை
யாருமே சிதைத்திடா ரமைச கோதரர்
சீரொடு பொருந்திடில் திரல்கொள் வாரரோ. |
|
| | கயிறாதற்குரிய ஓர் இழையினை அறுத்தல் யாவர்க்கும் எளிது. அவ்விழை பல ஒன்றாகிக் கயிறாக அமையின், அதனை யாராலும் அறுத்தல் முடியாது. அதுபோல உடன் பிறந்தார் பிரிந்து போய்த் தனிப்பாரானால் எளியரும் எளிதில் வெல்லுவர். ஒன்றுகூடி வாழின் வலியரும் அரிது முயன்றும் வெல்லார். |
| | தாம்பு-கயிறு. சிதைத்திடார்-அறுத்திடார். |
| | 5 |