இன்னிசை யாம் இன்பக் கடலில் -- எழுந்து
     எற்றும் அலைத்திரள் வெள்ளம்
தன்னிடம் மூழ்கித் திளைப்பாள் -- அங்குத்
     தாவிக் குதிப்பாள் எம் அன்னை.

தீஞ்சொற் கவிதையஞ் சோலை -- தனில்
     தெய்வீக நன்மணம் வீசும்
தேஞ்சொரி மாமலர் சூடி -- மதுத்
     தேக்கி நடிப்பள் எம் அன்னை.

வேதங்கள் பாடுவள் காணீர் -- உண்மை
     வேல்கையிற் பற்றிக் குதிப்பாள்
ஓதருஞ் சாத்திரம் கோடி -- உணர்ந்
     தோதி யுலகெங்கும் விதைப்பாள்.