முகப்பு

பக்கம் எண் :

தொடக்கம்

காவியங்கள் : கற்பனையும் கதையும் நான்காவது துகிலுரிதற் சருக்கம் திரௌபதியை இழத்தல் பாவியர் சபைதனிலே, -- புகழ்ப் பாஞ்சால நாட்டினர் தவப்பயனை, ஆவியில் இனியவளை, -- உயிர்த் தணிசுமந் துலவிடு செய்யமுதை, ஓவியம் நிகர்த்தவளை, -- அரு ளொளியினைக் கற்பனைக் குயிரதனைத் தேவியை, நிலத்திருவை, -- எங்குந் தேடினுங் கிடைப்பருந் திரவியத்தை, 39 படிமிசை இசையுற வே -- நடை பயின்றிடுந் தெய்விக மலர்க்கொடியைக் கடிகமழ் மின்னுருவை, -- ஒரு கமனியக் கனவினைக் காதலினை, வடிவுறு பேரழகை, -- இன்ப வளத்தினைச் சூதினில் பணயம் என்றே கொடியவர் அவைக்களத்தில் -- அறக் கோமகன் வைத்திடல் குறித்துவிட்டான். 40 வேறு வேள்விப் பொருளினையே -- புலை நாயின்முன் மென்றிட வைப்பவர்போல், நீள்விட்டப் பொன்மாளிகை -- கட்டிப் பேயினை நேர்ந்து குடியேற்றல் போல், ஆள்விற்றுப் பொன்வாங்கியே -- செய்த பூணையோர் ஆந்தைக்குப் பூட்டுதல்போல், -- கேள்விக் கொருவரில்லை -- உயிர்த்தேவியைக் கீழ்மக்கட் காளாக்கினான். 41 செருப்புக்கு தோல்வேண்டியே, -- இங்குக் கொல்வரோ செல்வக் குழந்தையினை? விருப்புற்ற சூதினுக்கே -- ஒத்த பந்தயம் மெய்த்தவப் பாஞ்சாலியோ? ஒருப்பட்டுப் போனவுடன், -- கெட்ட மாமனும் உன்னியத் தாயங்கொண்டே இருப்பகடை போடென்றான், -- பொய்மைக் காய்களும் இருப்பகடை போட்டவே. 42

முன் பக்கம்

மேல்

அடுத்த பக்கம்