:: TVU ::

பிற்சேர்க்கை : பல புதிய பாடல்கள்

இளசை ஒருபா ஒருபஃது

காப்பு நித்தரெனும் தென்னிளசை நின்மலனார் தாம்பயந்த அத்திமுகத் தெங்கோ ளடியிணையே -- சித்திதரும் என்தமிழி லேது மிழுக்கில்லா மெயஃது நன்றாகு மென்றருளும் நன்கு.
நூல்
தேனிருந்த சோலைசூழ் தென்னிளசை நன்னகரின் மானிருந்த கையன் மலரடியே -- வானிற் சுரர்தமனியன்மால் தொழுங்காற் கிரீடத் தரதனங்கள் சிந்து மகம்.	1
அகவிடத்திற் கோர்திலக மாமென் னிளசைப் பகவனென் னெட்டீசன் பதமே -- திகிரி பொருந்துகரத் தானென்றோர் போத்திரியாய்த் தேடி வருந்தியுமே காணாச் செல்வம்.	2
12. ஆதாரம்: சக்தி வெளியீடு -- பக்கம் 475 -- 476
செல்வ மிரண்டுஞ் செழித்தோங்குந் தென்னிளசை யில்வளரும் ஈசன் எழிற்பதமே -- வெல்வயிரம் ஏந்துகரத் தான்கரியன் எண்கணன்தம் உள்ளத்துப் போந்துவளர் கின்ற பொருள்.	3
பொருளாளரீய வேற்போரிளசை மருளாள நீச ரடியே -- தெருள்சேர் தமனா மறையவன்மேற் றன்பாச மிட்ட சமனாவி வாங்கும்பா சம்.	4
சங்கத் தவழ்கழனி தண் இளசை நன்னகரில் எங்கள் சிவனார் எழிற்பதமே-துங்கமிகும் வேதமுடியின் மிசையே விளங்குநற் சோதியென நெஞ்சே துணி.	5
துணிநிலவார் செஞ்சடையன் தோள் இளசை ஊரன் மணிகண்டன் பாதமலரே -- பிணிநரகில் வீழச்செய் யாது விரும்பியஈந் தேஅடியர் வாழச்செய் கின்ற மருந்து.	6
மருளறக் கற்றோர்கண் மருவிளசை ஊரில் வருமிறைவன் பாத மலரே -- திருவன் விரைமலரா வட்டவிழியாம் வியன்றா மரைபூத்த செந்தா மரை.	7
தாமரையின் முத்தெங்குந் தான்சிதறுந் தென்னிளசைக் கோமானெட் டீசன்மலர் கொள்பதமே -- நாமவேல் வல்லரக்கன் கைலை வரையெடுத்த காலவனை அல்லற் படவடர்த்த தால்.	8
ஆல விழியா ரவர்முலைநேர் தண்வரைசூழ் கோல மணி இளசைக் கோன்பதமே -- சீல முனிவர் விடுத்த முயலகன் மீதேறித் தனிநடனஞ் செய்ததுவே தான்.	9
தானே பரம்பொருளாந் தண்ணிளசை யெட்டீசன் தேனேய் கமலமலர்ச் சீரடியே -- யானேமுன் செய்தவினை தீர்த்துச் சிவாநந்தம் பொங்கியருள் எய்திடவுஞ் செய்யும் எனை.	10
தனி
கன்னனெனும் எங்கள் கருணைவேங்க டேசுரட்ட மன்னவன் போற்றுசிவ மாணடியே -- அன்னவனும் இந்நூலுந் தென்னாரிளசையெனும் நன்னகரும் எந்நாளும் வாழவைக்கு மே.	11