Untitled Document | 1770 | | ‘சின்னஞ் சிறியன், மதுவுண்டு
திரியும் லோலன்’ என்றுள்ளம்
கன்னக் கன்னப் பேசிஎனைக்
கலங்கச் செய்வர் கருணையிலார்;
அன்னை! அப்பா! நின்கோயில்
அடிமை யாக அணுகியபின்,
என்னை யானும் அறிவேனோ?
யான்செய் கருமம் எனதேயோ? | 101 |
| 1771 | | உன்னை உள்ளின் என்னுளத்தே
ஊக்கம் பெருகும் ஐயமில்லை;
உன்னை யல்லால் ஒருவரையிவ்
உலகில் நோக்கும் ஆசையிலேன்;
உன்னை நோக்கி என்முகமங்கு
ஒளிரக் கண்டு மகிழ்ந்திடுவேன்;
என்னை நோக்கி என்னுள்நீ
இருத்தல் கண்டு வாழ்த்திடுவேன். | 102 |
| 1772 | | நண்ணும் உயிருக் குயிர்நீயாம்;
நாடும் அன்பு நீயேயாம்;
கண்ணுள் மணியும் நீயேயாம்;
கருத்துள் ஒளியும் நீயேயாம்;
பண்ணின் சுவையும் நீயேயாம்;
பாவின் நயமும் நீயேயாம்
எண்ணின் நீயல் லாதபொருள்
யாரும் உண்டோ இவ்வுலகில்? | 103 |
| 1773 | | ஓதும் வேதம் ஒன்றுமில்லை;
உருட்டும் மணிதாழ் வடமில்லை;
ஆதி கோயில் தேடிநிதம்
அங்கும் இங்கும் அலைவதில்லை;
சாதி இல்லை மதமில்லை;
தாரணி மீதோர் ஆசையில்லை;
யாதும் கவலை இல்லை; எனக்கு
யாரே நிகராம் இவ்வுலகில்; | 104 | |
|
|