சுரந்திடும் ஊற்றுநீர் சுடுமென் றெண்ணி
விசிறுவார் உண்டோ ஓலை விசிறியால்?

அஃறினை மயிலே! ஆராய்ந்து பார்த்துச்
செய்வதைச் செய்தால் சிரிப்புக் கிடமிலை
என்பதை அறிக! என்மனங் கவர்ந்த
நாட்டியப் பறவையே நன்குநீ
ஆட்டுக தோகையே! ஆடுக நீயே!

முத்தங் கொடுப்பவளே - கொடி
      முந்தரி பூத்ததுபார்!
அத்தி மரக்கிளையின் - தளிர்
      ஆடும் அழகினைப்பார்!
குத்தும் மலையருகே - புறா
      கூவிக் குலவுதுபார்!
தொத்தும் பசுங்கிளியை - மயில்
       தூது விடுவதைப்பார்!

ஒத்த மனத்தினளே - குளிர்
      ஓடை ழுழவொலிபோல்,
சத்தங் கொடுக்குதடி - மலை
       சந்தனம் சிந்துதடி!
முத்துச் சிரிப்பழகி - மலர்
      மூச்சு மணக்குதடி.
கத்தரிக் கோடையிலே - இளங்
      கத்தரி காய்க்குதடி!

சங்கத் தமிழ்மதுரை - நகர்
      தாண்டித் தவழ்ந்துவரும்
மங்கலத் தென்றலிலே - கரு
       வண்டு மயங்குதடி!