:: TVU ::

சுரதாவின் தேன்மழை	24

வெயிலாடியுன் மேனிக றுத்ததுவோ?
    விளையாடியுன் பார்வைப ழுத்ததுவோ?
மயில்தான்கும ரேசனின் வாகனமோ?
     மணமேடையு னக்கெது? மாமரமோ!

என்னைத்தெரி யாதவ ரோபலபேர்;
     என்னைக்குறை கூறிடு வார்சிலபேர்;
உன்னைத்தெரி யாதவ ரேயிலரே;
     உயிரோவிய மே! முகி லின்பகையே!

நிலா

(`தெள்ளுதமி ழுக்குதவு சீலன்' என்னும்
காவடிச் சிந்து மெட்டு,)

ஆசைகொண்டு விண்வெளியின் மீது-மதி
    ஆடையின்றி யேவுலவும் மாது -முகில்
ஓசைகொண்ட மண்டலத்தில்
    ஊர்ந்துலவி வாழ்ந்துவரும்
          ஊமை-வெள்ளி
          ஆமை!

தேசமெல்லாம் சுற்றிவரும் தெப்பம் -குளிர்
    திங்களொரு சங்குமணி அப்பம் -சிலர்
பூசலுக்கும் ஏசலுக்கும்
    பொங்கியெழுங் காதலுக்கும்
          பொறுப்பு-நிலாச்
           சிரிப்பு!

வல்லியிடை மங்கையரை வாட்டும்-ஒளி
    வாங்கிவைத்து நம்மிடத்தில் காட்டும்! -ஆமூர்
மல்லனென்பான் தோளைநிகர்
    மாமலையின் உச்சியைப்போய்
          வாழ்த்தும்-தலை
           தாழ்த்தும்!