கங்கையில் குளித்திட் டாலும்,
              கதிபெற விரும்பிச் சேது
       கடலிடை முழுகி னாலும்,
              கருதிய படிக்கு வேறு
எங்குப்போய் எந்த நோன்பை
              எப்படி தோற்றிட் டாலும்
       என்னென்ன தாளம் ஈந்து
              புண்ணியம் எய்தி னாலும்
துங்கமாம் ஞானம் இன்றி
              விடுதலை வழிதோன் றாது;
       தூய்மையாம் பத்தி ஒன்றே
              துலங்கிடும் ஞான மூட்டும்
இங்கிதை நன்கு தேர்வாய்;
              இசைந்திடும் மார்க்க மெல்லாம்
       இவ்வொன்றை அன்றி வேறு,
              எவ்வொன்றும் சொன்ன தில்லை.       17

ஆசையாம் ராக மோகம்
              அழித்தலே சிறந்த போகம்;
       அமளிபுல் தரை; மெய்போர்த்த
              ஆவது மான்தோல் கோயில்
மாசிலா மண்ட பம்தான்
              மனக்குறை மாற்றும் இல்லம்
       மாயத்தைத் தீர்க்க அங்கோர்
              மரத்தடி விடுதி யாகும்;
தேசுலாம் செல்வத் தாலும்
              தேடரும் சுகம்யா தென்றால்
       தீர்க்கமாய் ‘வேண்டாம்‘ என்னும்
              திடமனம்; மகனே! தேர்வாய்
நீசமாம் ராகம் என்னும்
              மனவிகா ரத்தை நீக்கின்
       நிலவிடும் சுகத்தின் இன்பம்
              நிகரற்ற இன்ப மாகும்.       18