நாயக்கர் ‘தர்பார்’ மன்றம் கி.பி. 1600இல் கட்டப்பட்டதாகும்.
அழகிய தூண்கள், வளைவுகள், குவிமாடம், சித்திர வேலைப்பாடுகள்
ஆகியவற்றைக் கொண்ட இக்கட்டடப் பகுதியில் 160-க்கு மேற்பட்ட
வெண்கலச்சிலைகள் காட்சிப் பொருள்களாக உள்ளன. இவை தமிழ
மக்களின் வார்ப்புக் கலைத்திறனுக்குச் சிறந்த எடுத்துக்காட்டுகளாக
உள்ளன. இம்மன்றத்தில் இரண்டாம் சரபோஜி மன்னரின்
அழகிய பளிங்குச் சிலை ஒரு மேடைமீது நிறுவப்பட்டுள்ளது.
‘ஆயுதக்கோபுரம்’ என்ற மாடிக் கட்டடத்திலும் சில காட்சிப்
பொருள்கள் உள்ளன.

கலைக்கூடத்தை அடுத்து அரண்மனையின் ஒரு பகுதிக்
கட்டடத்தில் நூல்நிலையம் உள்ளது. தஞ்சை மன்னர்
சரபோஜியின் பெயரைக் கொண்ட இந்த நூலகம் அமைவதற்கு
இம்மன்னர் முக்கிய பங்கெடுத்தார். மருத்துவம், கலை,
இலக்கியம் சம்பந்தமான நூல்களையும், பழமையான ஓலைச்
சுவடிகளையும் சேகரிப்பதையும் படிப்பதையும் தம் இனிய
பொழுதுபோக்காகக் கொண்டிருந்தார். இவரது முயற்சிக்கு
சுவாட்ஸ் பாதிரியார் துணையாக இருந்தார், மன்னர் சரபோஜி
சேகரித்து வைத்த நூல்கள் இன்றைய சரஸ்வதி மகால்
நூலகத்தைப் பெரிதும் விரிவுபடுத்தின. இந்நூலகத்தில்
சுமார் 16,000 ஓலைச் சுவடிகளும், 24,000 காகிதச்
சுவடிகளும் உள்ளன.