‘‘செந்துறை மார்க்கம்’’ (இசைப்பாடல்) ஆமாறு.... நாற்பெரும் பண்ணும்
இருபத்தொரு திறனும் ஆகிய இசை எல்லாஞ் செந்துறை.... செந்துறை
என்பது பாடற்கேற்பது.... செந்துறை விரி மூவகைய: செந்துறையும்.
செந்துறைச் செந்துறையும், வெண்டுறைச் செந்துறையும் என. அவற்றுட்
செந்துறைப் பாட்டாவன: பரிபாடலும், மகிழிசையும், காமவின்னிசையும்

என்பன. என்னை?

         ‘‘தெய்வங் காம

        மையில் பொருளாம் பரிபா டல்லே

        மகிழிசை நுண்ணிசை யுரிபெரு மரபிற்

        காமவின் னிசையே யாற்றிசை யிவற்றைச்

        செந்துறை யென்று சேர்த்தினர் புலவர்’’

என்றாராகலின்.¹

     அன்றியும், இப்போது கிடைத்துள்ள இருபத்தொரு பரிபாடல்களுக்கு,
அப்பாட்டுகளைப் பாடிய புலவர் பெயர்களும், அப்பாட்டுக்குப் பண் வகுத்த
இசைப் புலவர் பெயர்களும் பண்பெயரும் எழுதப்பட்டிருப்பதனாலே,
பரிபாடல்கள் இசைப்பாடல்கள் என்பதை ஐயமற உணரலாம். இப்பரிபாடல்
இருபத்தொன்றுக்கும் பண் வகுத்த இசைப் புலவர்களின்
பெயர்களாவன:

     பெட்டனாகனார், கண்ணனாகனார், மருத்துவன் நல்லச்சுதனார்,
பித்தாமத்தர், நாகனார், நன்னாகனார், நல்லச்சுதனார், தமிழரில் நாகர்
என்னும் பிரிவினர் பண்டைக் காலத்தில் இருந்தார்கள். அவர்கள்
இசைப்பயிற்சியில் தேர்ந்தவர்களாயிருந்தனர்.

1. யாப்பருங்கலம், ஓழிபியல் உரை மேற்கோள்