7. படர்க்கை `இ' விகுதி

    தமிழிலுள்ள பெண்பால் விகுதிகளுள் ஒன்றான `இ' என்பது `ஸ்திரி' என்னும் வடசொற் சிதைவென்று, 1951 மார்ச்சில் வெளிவந்த மதுரைக் கல்லூரி ஆண்டு மலரில், அக் கல்லூரித் தலைமைத் தமிழாசிரியர் திருவாளர் இரா. கிருஷ்ணமூர்த்தி (B.A., B.O.L., L.T.) அவர்கள் வரைந்துள்ளார்கள் என ஒரு தமிழன்பர் எழுதியுள்ளார். அது ``புல்லா வெழுத்திற் பொருளில் வறுங்கோட்டி'' யாயினும், அதனால் பலர் மயக்குண்டிருப்பதாகத் தெரிகின்றதனால், அதற்கு உடனே மறுப்பெழுதாவிடின்,

என்பதற்கிணங்க, அது ஒருகால் எதிர்கால இலக்கண நூலிலும் இடம் பெறலாமென்று கண்டு, இம் மறுப்பை எழுதலானேன்.

    மதுரைக் கல்லூரி யிதழில் இகர விகுதியைப் பற்றி வரையப்பட்டுள்ள பகுதி வருமாறு:

    'இ' என்பது தமிழில் பெண்பால் விகுதி என்று கூறப்படுகிறது. உண்மையில் பெண்பால் விகுதி 'இ' அல்ல. அது பெண்பால் விகுதியாயின் 'வில்லி', 'நாற்காலி' முதலியவற்றில் அப் பொருளில் வராதிருப்பதேன்? உண்மை என்னவென்றால், 'இ' என்பது 'ஸ்திரி' என்பதன் சிதைவு. பெரும்பாலும், 'த்தி,' 'ச்சி', 'ட்டி' என்பவையே பெண்பால் விகுதிகளாக வருகின்றன. இவை 'ஸ்திரி' என்பதன் மாறுபட்ட உருவங்கள் என்பது தெளிவு. முதலில் 'ஸ்திரி' என்பதே `பெண்பால் விகுதியாக இருந்து பிறகு அது சிதைந்து 'த்தி', 'ச்சி', 'ட்டி' என்று மாறியிருக்க வேண்டும்.