:: TVU ::

3. முதல் சொல்லின் இறுதி எழுத்து இ

எடுத்துக்காட்டு	தொடரும் சொல், விகுதி	சந்தி	விளக்கம்

துணி+கடை=துணிக் கடை கத்தரி+செடி=கத்தரிச் செடி குட்டி+பையன்=குட்டிப் பையன்	க,ச,த,ப	மிகும்	‘துணியை விற்கும் கடை’ என வேற்றுமைத் தொகையாகவும் ‘கத்தரியாகிய செடி’ என இருபெயரொட்டாகவும் பெயர்ச்சொல் அடையாகவும் (எ-டு குட்டி) வரும்போது ஒற்று மிகும்.
ஓடி+போ=ஓடிப் போ	க.ச,த,ப	மிகும்	‘ஓடி’ போன்ற (‘செய்து’ என்னும்) வினையெச்சத்தின் பின் ஒற்று மிகும்
பற்றி+சொல்= (உன்னை) பற்றிச் சொல்	க,ச,த,ப	மிகும்	‘பற்றி’ என்பது வினையடை.
மாதிரி+படிவம்=மாதிரிப் படிவம்	க,ச,த,ப	மிகும்	‘மாதிரி’ என்பது பெயர்ச்சொல்லாக இருந்து மற்றொரு பெயர்ச்சொல்லுடன் இணையும்போது ஒற்று மிகும்.
மாதிரி + பேசு= (நடிகர்)மாதிரி பேசு மாதிரி+செய்= (சொன்ன) மாதிரி செய்	க,ச,த,ப	மிகாது	‘மாதிரி’ என்பது ‘போல’ என்னும் பொருளில் வரும்போது ஒற்று மிகாது.
படி+கொடு= (கேட்ட) படி கொடு படி+செய்= (விருப்ப) படி செய்	க,ச,த,ப	மிகாது	‘படி’ என்னும் இடைச்சொல் ‘முறையில்’, ‘போல’ என்னும் பொருளில் வரும்போது ஒற்று மிகாது.
செடி+கொடி=செடிகொடி	க,ச,த,ப	மிகாது	செடியும் கொடியும் என்பதில் ‘உம்’ இல்லாமல் (உம்மைத் தொகையாக) வரும்போது ஒற்று மிகாது.
குடி+தண்ணீர்=குடிதண்ணீர் வெடி+பொருள்=வெடிபொருள்	க,ச,த,ப	மிகாது	முதற்சொல் வினையடியாக இருக்குமானால் (வினைத்தொகையில்) ஓற்று மிகாது.
செடி+கள்=செடிகள்	-கள்	‘க்’ மிகாது	‘-கள்’ பன்மை விகுதி.
மொழி+இயல்பு=மொழி இயல்பு கோழி+இறகு=கோழி இறகு	உயிரெழுத்து	‘ய்’ இடையில் வருவதில்லை	பெரும்பாலும் உடம்படுமெய் தந்து எழுதுவதில்லை.