வினையாக வெளிப்படுவதும், வினைப்பெயராற் குறிக்கப்படுவதும் செயற்பண்பாம்.

(6) தொழிற்பெயர் (Verbal Noun)

தொழிற்பெயர் எனினும் வினைப்பெயர் எனினும் ஒக்கும். சிறுவினை பெருவினை என வினை (தொழில்) இருவகைப் படும். வருதல், போதல், உண்டல், உடுத்தல், போன்றவை சிறுவினை; உழவு, நெசவு, தச்சு, கல்வி, ஆட்சி போன்றவை பெருவினை.

எல்லாப் பெயர்களும் பின்வருமாறு வெவ்வேறு வகையில் இவ்விருபாற்படும்.

(1) பொதுப் பெயர் X சிறப்புப் பெயர்

பல பொருட்குப் பொதுவான பெயர் பொதுப்பெயர்; ஒன்றற்கே சிறப்பாக வுரியது சிறப்புப் பெயர்.

எ-டு: ஆறு, நகர், புலவன்-பொதுப்பெயர் (Comman Noun)

காவிரி, மதுரை, நக்கீரன்- சிறப்புப் பெயர் (Proper Noun)

அரசன் அல்லது வேந்தன் என்னும் பெயரை நோக்க. பாண்டியன் என்பது பொதுவிற் சிறப்பும், நெடுஞ்செழியன் என்னும் பெயரைநோக்க, தலையாலங்கானத்துச் செருவென்ற நெடுஞ் செழியன் என்பது சிறப்பிற் சிறப்பும் ஆகும்.

(2) இயற்பெயர் X ஆகுபெயர்

இயல்பாக ஒரு பொருட்கு உண்டான பெயர் இயற்பெயர்; ஒரு பொருளின் பெயர் இன்னொன்றற்கு ஏதேனுமொரு தொடர் பில் ஆகி வருவது ஆகுபெயர்.

எ-டு: காளை (மாடு), பொன் (கனியம்), வற்றல்(வினை)- இயற்பெயர்.

காளை (மறவன்),பொன்(பொற்காசு), வற்றல் (வற்றிய காய்கனி)-ஆகுபெயர் (Metonymy, Synecdoche)

(3) தனிநிலைப்பெயர் X குழூஉப் பெயர்

ஒரு தனிப்பட்ட பொருளின் பெயர் தனிநிலைப்பெயர்; பல பொருள் சேர்ந்த கூட்டத்தின் பெயர் குழூஉப்பெயர்.

எ-டு: காய், ஆடு, தமிழன் -தனிநிலைப்பெயர்

குலை, மந்தை, கழகம் -குழூஉப் பெயர் ( Collective Noun)