இனி, வழக்கு வருமாறு:-

     ஆன் (ஆல்) உருபு :

     மண்ணான் இயன்ற குடம் - கருவி

     ஊரான் ஒரு கோவில் - உடனிகழ்ச்சி.

     (ஊரான் = ஊர்தொறும்)

     ஒடு உருபு :

     ஊசியொடு குயின்ற தூசு - கருவி

     நாயொடு நம்பி வந்தான் - உடனிகழ்ச்சி.

     ஆங்கிலத்திலும் இவ் வழக்கு ஒத்திருப்பது கவனிக்கத்தக்கது.

     With (ஒடு) :

     Write with a pen - கருவி

     Went with him - உடனிகழ்ச்சி

     By (ஆல்) :

     Live by bread - கருவி

     Stand by him - உடனிகழ்ச்சி

     இங்ஙனமே, 5ஆம் வேற்றுமைக்குரிய நீங்கல், ஒப்பு, எல்லை, ஏது என்னும் நான்கும், நீக்கப் பொருளின் நுட்ப வேறுபாடுகளே. இங்கு ஒப்பு என்றது உறழ் பொருவை (comparative degree). ஒப்புப் பொருவு (positive degree) 2ஆம் வேற்றுமைக்குரியதாம்.

"ஐந்தா குவதே
இன்எனப் பெயரிய வேற்றுமைக் கிளவி
இதனின் இற்றிது என்னும் அதுவே."

(559)

என்னும் தொல்காப்பிய நூற்பாவை நோக்குக.

     3ஆம் வேற்றுமைக்குக் கருவிப் பொருளொடு உடனிகழ்ச்சிப் பொருள் வடமொழியிலுமுள்ளது. இதை, "இனிச் சகார்த்தமாய் வந்த திருதியையைச் சகார்த்தத் திருதியை என்றும், சகார்த்தமென்றும்.. .... கூறுவர்" என்னும் பிரயோக விவேக உரையாலும் (பக்கம், 11), "saha governs the instrumental" என்று இராமகிருட்டிண கோபால பந்தர்க்கார் தம் சமற்கிருத முதற் புத்தகம் 24ஆம் பக்கத்தில் எழுதியிருக்கும் அடிக்குறிப்பாலும், அறிக.

     ஆங்கிலத்தில் எழுவாய், கிழமை (possessive), செய்பொருள் (objective) என மூவேற்றுமையும்; செருமானியத்தில் எழுவாய், செய் பொருள் (accusative) கிழமை (genitive) கொடை என நால்வேற்றுமை யும்; இலத்தீனில் எழுவாய், விளி, செய்பொருள் (accusative) கிழமை (genitive) கொடை என ஐவேற்றுமையும்; கிரேக்கத்தில் எழுவாய், கிழமை (genitive) கொடை, செய்பொருள் (accusative)