என்பதில் புரட்டாசி என்ற சொல் வாய்மொழியிலே சிதைந்த உருவமாகிய பெரட்டாசி என்று நின்று, பெரிய என்பதில் உள்ள முதலெழுத்தோடு ஒன்றி மோனையமைதி பெற்றிருக்கிறது. பெரட்டாசியைப் புரட்டாசி ஆக்கிவிட்டால், பெரிய என்பதைப் புரிய ஆக்க இயலுமா?

மோளங்களும் தாளங்களும் முழங்குதடி கோயிலிலே¹

என்பதில் மேளம் மோளமாகியிருக்கிறது.

புள்ளையைப்போல் பொத்திப் பொத்திக் - கண்ணே நல்ல
    பொறுமையோடே வளர்ப்பாங்களாம்²

என்பதில் பிள்ளை புள்ளையாகி யிருக்கிறது.

அடிதொடங்கி நுனிவரைக்கும் - கண்மணியே
    அல்லாத்துக்கும் காசுதானாம்³

என்பதில் அல்லாத்துக்கும் என்பதை எல்லாவற்றிற்கும் என்று மாற்றினால் மோனை போய்விடும்.

    சிதைந்த சொல்லைத் திருத்தப் புகுந்தால் ஓசை கெட்டுவிடுவதற்குச் சில உதாரணங்கள் வருமாறு:-

தமயந்தியைக் கட்டணுன்னு
    சனிபகவான் பட்டபாடு⁴

என்பதை, ‘தமயந்தியைக் கட்டவேண்டுமென்று’ என்று மாற்றினால் ஓசை கெட்டுவிடும்.

பிச்சை கொடுக்க ணும்னாக் கூடச் சுண்டெலிப் பெண்ணே
    பட்சமாய்க் கொடுக்க ணுண்டி சுண்டெலிப் பெண்ணே⁵

என்பதில், “பிச்சை கொடுக்க வேண்டுமென்றால்கூட” என்று திருத்தினால் ஓசை நீண்டுகொண்டே போகும்.

ஆடிருக்கு மாடிருக்கு - கண்ணே உனக்கு
    அழகான வீடிருக்கு⁶

என்பதிலுள்ள சொற்களை, ‘ஆடிருக்கிறது, மாடிருக்கிறது, வீடிருக்கிறது’ என்று மாற்றினால் அப்பால் அதில் பாட்டே இராது.
______________________________________________________
    1. மலையருவி, 223; 6.                     
    2. மேற்படி 243; 82.     
    3. மேற்படி 243; 89.
    4. மேற்படி 92; 51.
    5. மேற்படி 207; 54.
    6. மேற்படி 222; 2