:: TVU ::

32	முத்துப்பட்டன் கதை

	சேரனிடம் போனோமானால் சேவிக்கலாம் மிச்சமில்லை சோழனிடம் போனோமானால் சோறுண்டு சுனையுமில்லை⁷ பாண்டியனிடம் போனோமானால் பழுதுவரு மென்றுசொல்லி கொட்டாரக் கரைதனிலே ராமராஜ னரண்மனையில் போகவேணு மென்றுசொல்லி புகழுடைய முத்துப்பட்டன் கொட்டாரக் கரையதிலே ராமராஜன் ஊரதிலே சட்டனவே தானடந்து சஞ்சலமாய் வீற்றிருந்தான்
	முத்துப்பட்டனின் ஆற்றலைக் கொட்டாரக்கரை மன்னன் காணல்
	ராஜனுமே வீற்றிருக்க நாட்டியங்கள் ஆடிவர அப்போது முத்துப்பட்டன் அவனுடைய தொழில்காண சமுத்திரத்தில் வாள்நிறுத்தி சக்கரம்போல் சுழன்றுவந்தான் கண்டானே அரசமன்னன் கட்டழகன் பட்டனைத்தான் ராஜாவோ மந்திரியோ நமக்குஇவன் மாற்றானோ வாடாநீ அறிக்கைக்காரா வார்த்தையொன்று சொல்லக்கேளாய் அக்ஷணமே அறிக்கைகாரா அவனையிங்கே அழைத்துவாடா
	மன்னன் முன் முத்துப்பட்டன்
	அப்போ தறியக்காரன் அவனையங்கே யழைத்துவந்தான் வந்தவுடன் ராஜமன்னன் வாய்திறந்தேது சொல்வான் எந்தவூர் எந்ததேசம் எங்கிருந்து வந்தபிள்ளை என்று சொன்ன வேளையிலே ஏத்தரிய⁸ முத்துப்பட்டன் சொல்லுவானா மரசனிடஞ் சோதிமுத்து வாய்திறந்து ஆரிய நாடதிலே ஆறண்ணன் மாரோடோ சண்டையிட்டு யான்பாவி தனிவழியே வந்துவிட்டேன் என்னையொரு சேவகமா யிருத்திக்கொள்ள வேணுமையா
	மன்னனிடம் வேலைக்கு அமர்தல்
	என்றுசொன்ன வேளையிலே ஏற்றதொரு அரசமன்னன் பதினாறு வயதுப்பிள்ளை பல கணக்குப் படித்தாரென்று கைக்காயிரம் மெய்க்காயிரம் கால்க்காயிரம் வாள்க்காயிரம் நன்றாக சேவகன்தான் நமக்குஇவன் கிடைத்தானென்று நாலாயிரம் பொன்சம்பளம் நலமாகத் திட்டம்செய்து சேவகற்கு மனுவெழுதி⁹ திறமையுட னிருக்கையிலே
	முத்துப்பட்டனைத் தேடி தமையன்மார் வரல்
	ஆரிய நாடதிலே ஆறண்ணன் மார்கூடி சண்டையிட்டுப் போனதென்று தம்பியைத்தான் தேடியல்லோ வாராரே ஊர்க்கொருவர் வழிமேலே தேடிக்கொண்டு அம்பலப் புழைதனிலே மகாதேவருட கோவிலிலே