:: TVU ::

முத்துப்பட்டன்
வில்லுப்பாட்டு

	நாவுளறிக் கால்பதறி அவன் ஏதோ சொல்லுவான். பாவியைப் பார்த்திந்தமொழி சொல்ல நியாயமோ பார்த்தபேர்க்கு ஏற்றிடுமோ நேர்த்திதானிது.
	பட்டனின் வேண்டுகோளுக்குப் பகடையின் பதில்
	நாயல்லவோ எங்கள்குலம் ஓ நயினாரே ! நாற்றமுள்ள விடக்²⁵கெடுப்போம் ஓ நயினாரே ! செத்த மாடறுக்க வேணும் ஓ நயினாரே ! சேரிக்கெல்லாம் பங்கிடவேணும் ஓ நயினாரே ! ஆட்டுத்தோலும் மாட்டுத்தோலும் அழுகவைப்போமே, அதையெடுத்து உமக்குநன்றாய் அடியறு²⁶ ப்போமே, அடியறுப்போம் சுவடுதைப்போம் வாரறுப்போமே அதையெடுத்துக் கடைக்குக்கடை கொண்டு விற்போமே, சாராயம் கள்குடிப்போம் வெறிபிடித்தபேர் சாதியிலே சக்கிலியன்தான் நயினாரே,
	பட்டனின் மறுமொழி
	கோபம் வேண்டாம் மாமனாரே சொல்லக்கோளும் நீர் கோடிகோடி தர்மமுண்டு உமது மக்களை சாதிமுறையாகத் தாலிகெட்டி வைத்தாக்கால் சகலதொழிலு முங்கள்கூட செய்வேனான். தாய் தகப்பன் நீயல்லவோ யின்றுமுதலுக்கு சாதிசனம்போல் நின்றுவாரேன் குடிலுக்கு.
	தன்பெண்ணை மணம் செய்து கொடுக்க பகடை விதித்த நிபந்தனைகள்
	வருகிறேன் என்றீர் சுவாமி என்னபிரமை வருமிடத்தில் சொல்லுவது வகைக்குவருமோ?²⁷ அப்படிச் சிவன் கற்பனை²⁸ உண்டுமானால் நாற்பது நாளைக்குள் முப்புரிநூலும் குடுமியும் மெய்யுடன் அறுத்தெறிந்து எங்களைப்போல் ஒப்புடன்நீர் செருப்புக்கட்டி வந்தாக்கால் எப்படியாகிலும் மக்களைக் கைபிடித்துத் தாரேன்
	இருவரும் பிரிந்த செல்லல்
	தாரேனென்று சொன்னமொழி சத்தியமென்று சாக்ஷிவை, சூரியன்மேல், சஞ்சலமில்லாமல் எந்தனை ஊருக்கு தானனுப்பு மாமா போய்வாரு மூருக்கு பொழுது மடையுமுன்னே போறேனென்று வாலப்பகடை போய் கிடைசேர்ந்தானே.