47. சிரித்த முகம் சிரித்த முகம் வேணுமடி பெண்ணே - அதுதான்
சேவை செய்யும் பெண்களுக்கு
அழகு தரும் கண்ணே! (சிரித்த) வருத்தங்கள் வாழ்க்கையிலே வந்து வந்து போகும் - அது
வந்து புகும் வாழ்விலேதான்
இன்பம் வந்து சேரும்! (சிரித்த) கிள்ளக் கிள்ளத் தேயிலையும்
தழையுது பாரு - கடமை
செய்யச் செய்ய நன்மை வந்து
விளையுது பாரு...
மெள்ள மெள்ளத் துன்பம் வரும்
இயற்கையின் கூறு - அதைத்
தள்ளிவிட்டுக் கடமையிலே
இதயத்தைச் சேரு... (சிரித்த) மேடு பள்ளம் தாண்டுவதால்
சிதறிவிழும் அருவி - தரை
மேல்விழுந்து ஒன்றுகூடி அமைதியுடன் மருவி
நாடு நலம் செழிப்பதற்கு நாடி வருதல் போலே
நம்மிதயம் பதறிடாமல் பணிபுரிவோம் அதாலே... (சிரித்த) (‘கண்ணாடி மாளிகை’ திரைப்படப் பாடல் -1) |