75
மீண்டும் வருமோ?
-

கண்பழு தாகினுங் காணலாம் - உலகைக்
    காணுங் கருவியைப் பூணலாம்
பண்புகள் பாழ்பட நேருமேல் - என்ன
    பக்குவஞ் செய்யினுந் தீருமோ?

உண்ணும் உணவுகள் மாறுமேல் - வேறோர்
    உண்டி தனைக்கொண்டு தேறலாம்
எண்ணும் நினைவுகள் மாறுமேல் - பாரில்
    எப்படி உயர்ந்திட லாகுமோ?

பள்ளம் படுகுழி வீழ்ந்தவன் - வந்து
    பார்த்தவன் கைதர மீளலாம்
உள்ளம் படுகுழி வீழுமேல் - பின்னர்
    ஓங்கிய வாழ்வினில் மீளுமோ?

நஞ்சினை உண்டொரு மாந்தனும் - உய்ந்து
    நானில வாழ்வினை ஏந்தலாம்
நெஞ்சகம் வஞ்சனை உண்ணுமேல் - வாழ்வு
    நேர்மையிற் சென்றிட ஒண்ணுமோ?

மந்தையில் மேய்ந்திடும் மாடுகள் - வந்து
    மாலையில் வீட்டினைக் கூடலாம்
சிந்தை மேய்ந்திடப் போகுமேல் - வந்து
    சேரிடம் எய்திடல் ஆகுமோ?