பஞ்சணை தூங்கிடுவேன் - தமிழால்
பாடி எழுப்பிடுவாள்
கொஞ்சு மொழிபேசி - வெந்நீர்
குளித்திட வாருமென்பாள்
நெஞ்சினில் அன்பொழுக - அப்பம்
நெய்யொழுகத் தருவாள்
வஞ்சி விடைதருவாய் - என்றால்
வாள்விழி காட்டிடுவாள் சென்றிடு வேன்அலுவல் - மனையில்
செய்வன செய்திடுவேன்
ஒன்றும் மணியோசை - கேட்டால்
ஓடிடு வேன்அவள்பால்
முன்றினில் நின்றிருப்பாள் - வாயின்
முத்துக்கள் காட்டிடுவாள்
கன்றிடத் தந்திடுவாள் - முத்தம்
கணக்கில் அடங்காவே உடைகளை மாற்றிவிட்டுக் - காற்றில்
உலவிடச் சென்றிடுவோம்
கடைகளும் சென்றிடுவோம் - நல்ல
கட்டுப்பூ வாங்கிடுவாள்
நடைஎழில் காட்டிஅவள் - அரும்பு
நகைத்திடப் பால்கொணர்வாள்
தடையொன்றும் இல்லாமல் - இன்பம்
தந்திடு வாளவளே |