| 80 | கவியரசர் முடியரசன் படைப்புகள் - 2 |
53
ஏழையைக் கண்டிலேன்!
- கல்லைக் கனிய வைத்தான் - அங்கே
கற்பனை தேக்கி வைத்தான்
சொல்லத் துடிதுடித்தே - கவிதை
துள்ளிக் குதித்ததடா! உண்ணவும் நேர மிலான் - சற்றே
ஓய்வும் ஒழிவு மிலான்
எண்ண மெலாங் குவிய - நெஞ்சில்
ஏக்கம் நிறைந்ததடா! ஐந்து விர லிடையே - சிற்றுளி
ஆடித் திரிந்ததடா!
அந்த நடந் தனிலே - அவன்விழி
ஆழ்ந்து பதிந்ததடா! எண்ணமும் சிற்றுளியும் - பெற்ற
ஏந்திழைப் பெண்ணொருத்தி
வண்ண முகங் காட்டிச் - சிற்ப
வாழ்வினைக் கொண்டுநின்றாள் மங்கையைப் போற் றிடவே - பளிங்கு
மாளிகை கட்டி வைத்தார்
எங்கும் அவள் புகழே - கண்டேன்
எத்தனை விந்தையடா! மங்கைக்கு வாழ்வளித்த - சிற்பி
மாய்ந்து மறைந்துவிட்டான்
எங்கெங்குத் தேடினுமே - அந்த
ஏழையைக் கண்டிலனே! |