மூவிரண் டாண்டு செல்ல
முதன்முதல் தொடங்குங் கல்வி
நாவினில் ஓதி ஓதி
நலம்பெற விழைந்து பள்ளிக்
கோவிலுட் புகுந்த தந்தக்
குலக்கதி ரேசப் பிள்ளை
பூவினுள் மணிவண் டொன்று
புகுந்தது தேனை மாந்த 4 பழுதற எழுதக் கற்றுப்
படித்தனன் நெடுங்க ணக்கை
அழகிய ஆத்தி சூடி
அறஞ்சொலும் உலக நீதி
விழைவுடன் ஓதி ஓதி
விரைவினிற் கற்றுத் தேர்ந்து
தொழுதகும் ஆசா னுக்குத்
தொடுத்தனன் புகழின் ஆரம் 5 படித்தனன் ஏழு திங்கள்
பயின்றது போதும் என்று
தடுத்திட எண்ணி முற்றுப்
புள்ளியும் தந்தை வைத்தார்
அடிக்கடி படித்த பாடல்
அடிமனத் தெழுந்து நின்று
நடித்ததோர் இன்பக் கூத்து
நாளெலாம் நினைந்து பார்த்தான் 6 பள்ளியில் ஏழு திங்கள்
பயில்கதி ரேசப் பிள்ளை
தெள்ளிய மதிய ராகித்
தேர்ந்தநற் புலவ ராகி
அள்ளிய புகழாம் செல்வம்
அளப்பில பெற்றான் என்றால்
உள்ளவும் படுமோ அந்த
ஓய்விலா உழைப்பை அம்மா! 7 |