முன்னவள்பேர் கலியாணி; அம்மகளை
       மொய்த்தமலர் சூட்டு தற்குச்
சொன்னமொழி மாறியது நெஞ்சத்தைச்
       சுட்டதனால் திருந்தி வந்து,
மின்னுமெழில் முகத்தாளைக் குணமிகுந்த
       மேலாளைக் கலியா ணிக்குப்
பின்னவளை மீனாட்சி எனப்பகரும்
       பேராளைத் தரநி னைந்தார். 8

மணியுடையார் உடற்குறையைக் கருதிலராய்
       மகட்கொடைக்கு முன்வந் தார்தாம்
1 பணமுடையார் இவரென்று சற்றுமனம்
       பரிதவிக்க அதனைக் கண்டு
பணமுடையார் சபைகண்ட பழநியப்பர்
       பரிவுடையார் ‘மணத்திற் கென்ன
பணந்தடையா? கவலற்க ஈப்போவில்2
       பங்காளி யாக்கிக் கொள்வேன் 9

மலைத்திடுதல் கைவிடுக மணஞ்செய்க
       வழிசெய்வேன்’ என்று கூறிக்
கலைத்துறையில் வல்லகதி ரேசர்க்குக்
       கடையிலொரு பங்குந் தந்தார்
நலத்தக்க மீனாட்சி, கதிரேசர்
       நல்லறத்தில் துணைவரானார்
நிலைத்தக்க சபைத்தொடர்பால் மதிபெற்றார்
       நிதிபெற்றார் மணமும் பெற்றார். 10

கைநிறைந்த பொருள்பார்ப்பர் பெண்பெற்றார்
       கண்ணிறைந்த கணவ னைத்தான்
மைவரைந்த விழியுடைய பெண்பார்ப்பாள்
       மாநிலத்தில் ஈதி யற்கை
1ஐவிளைந்த கொடியிடையார் மீனாட்சி,
       அன்பரவர் மெய்யைப் பாரார்
2தைநிறைந்த மதிவிளைந்த மெய்பார்த்துத்
       தரம்பார்த்து மணந்து கொண்டார். 11

1.பணம் + முடையார். 2ஈப்போ - மலேசியாவில் உள்ள கடையில்.
1அழகு. 2தைமாதமுழுநிலவுபோன்ற பேரறிவு.