புணர்ச்சி

நிலைமொழியின் ஈறும் வருமொழியின் முதலும் சேர்ந்து புணர்வது புணர்ச்சி எனப்படும். இப்பகுதியில் உடம்படுமெய்ப்புணர்ச்சி, குற்றியலுகரப்புணர்ச்சி ஆகியவற்றை மட்டும் விரிவாகக் காண்போம்.

உடம்படுமெய்ப் புணர்ச்சி

நிலைமொழி இறுதியிலும் வருமொழி முதலிலும் வரும் உயிரெழுத்துகளை இணைக்கும் மெய்யெழுத்துகளே உடம்படுமெய்கள் எனப்படும்.

சான்று:

மலை, அருவி = மலை + ய் + அருவி = மலையருவி

இளங்கோ + அடிகள் = இளங்கோ + வ் + அடிகள் = இளங்கோவடிகள்

நிலைமொழி இறுதியில் இ, ஈ, ஐ நின்று, வருமொழி முதலில் உயிரெழுத்து வந்தால் யகர உடம்படுமெய் பெற்று வரும்.

நிலைமொழி இறுதியில் அ, ஆ, உ, ஊ, எ, ஒ, ஓ, ஔ நின்று, வருமொழி முதலில் உயிரெழுத்து வந்தால் வகர உடம்படுமெய் பெற்று வரும்.

நிலைமொழி இறுதியில் ’ஏ’ என்னும் எழுத்து நின்று, வருமொழி முதலில் உயிரெழுத்து வந்தால் யகர, வகர உடம்படுமெய் பெற்று வரும்.

குற்றியலுகரப் புணர்ச்சி

குற்றியலுகரப் புணர்ச்சி நிலைமொழியின் ஈற்றில் குற்றியலுகரச்சொல் (குறுகி ஒலிக்கின்ற உகரம்) நிற்க, வருமொழி முதலில் உயிரெழுத்து வருமானால் நிலைமொழி ஈற்றில் உள்ள உகரம் கெட்டு மெய்யீறாய் நிற்கும். அந்த மெய்யீற்றின் மேல் வருமொழியின் முதலில் உள்ள உயிரேறிப் புணரும்.

சான்று:

நாடு + ஆகும் = நாடாகும்
நிலைமொழியின் ஈற்றில் உள்ள உகரம் நீங்கியது = நாட் + ஆகும்
வருமொழியின் முதலில் உள்ள உயிரேறிப் புணர்ந்தது = நாடாகும்

குற்றியலுகரப் புணர்ச்சி ஆறு வகைப்படும்.

டு, று என்னும் எழுத்துகளை ஈற்றில் கொண்ட நெடில்தொடர், உயிர்த்தொடர்க் குற்றியலுகரங்கள் நிலைமொழியாக நின்று, வருமொழி முதலில் உயிரோ, மெய்யோ வந்து புணரும்போது, நிலை மொழி ஈற்று ஒற்று இரட்டித்துப் புணரும்.