சான்றிதழ்க் கல்வியின் பாடத்திட்டங்கள்

சான்றிதழ்க் கல்விக்கான அனைத்துப் பாடங்களும் இணையவழிப் பல்லூடக வசதிகளைப் பயன்படுத்திக் கற்பதற்கு எளிய, முறையில், ஆர்வம் ஊட்டும் வகையில் வழங்கப்படுகின்றன. இப்பாடங்களின் விவரங்கள் கீழே கொடுக்கப்பட்டுள்ளன.

AM00 அகரம் (1 & 2 ஆம் வகுப்புக்கு நிகரானது)

எழுத்துகள் அறிமுகம், சொற்களைக் கற்றல், சிறு தொடர் கற்றல், எழுதும் பயிற்சி, மழலைப் பாடல்கள், அறநெறிக் கதைகள், எளிய இலக்கணம் முதலான பாடப்பொருண்மைகளை உள்ளடக்கி உருவாக்கப்பட்டுள்ளது.

தமிழ் மொழியில் உறவுமுறைப் பெயர்கள் மட்டுமல்லாது, நமது அன்றாட வாழ்விலும் வகுப்பறையிலும் பயன்படுத்தக் கூடிய பொருள்களின் பெயர்களையும். நம்மைச் சுற்றிக் காணும் பொருள்களான மரங்கள், செடிகள், கொடிகள், பூக்கள், காய்கள், கனிகள், மின்பொருள்கள், போக்குவரத்து ஊர்திகள் போன்றவற்றின் பெயர்களையும் தமிழில் கேட்கவும், பேசவும், படிக்கவும், எழுதவும் பயிற்சிகள் அளிக்கும் வகையில் பாடங்கள் வடிவமைக்கப்பட்டுள்ளன.

IM00 இகரம் (3, 4 & 5 ஆம் வகுப்புக்கு நிகரானது)

அகரத்தின் தொடர்ச்சியாக இகரம், உகரம், ழகரம், சிகரம் என அடுத்தடுத்த நிலைகளுக்கு மொழி, நாடு, சமூகம், இயற்கை, கல்வி, தொழில், கலை, பண்பாடு, அறிவியல், தொழில் நுட்பம், அறம், நல்வாழ்வு, ஆளுமை, மனிதநேயம் என்ற பொருண்மைகளின் அடிப்படையிலும் உரைநடைப் பகுதியும், சொல், தொடர், இலக்கணம், பொருள் ஆகிய மொழிக் கூறுகளை மையப்படுத்தி இலக்கணத்தையும் கொண்டு பாடங்கள் உருவாக்கப்பட்டுள்ளன.

மேலும், சொற்றொடர் உருவாக்குதல், பொதுச் செய்திகளை அறிந்துகொள்ளும் வகையில் தகவல்துளி, மொழிபெயர்ப்பு, படைப்பாற்றல் முதலானவற்றில் பயிற்சி பெறும் வகையில் பாடங்கள் வடிவமைக்கப்பட்டுள்ளது.

UM00 உகரம் (6, 7 & 8 ஆம் வகுப்புக்கு நிகரானது)

இந்நிலையில், தமிழ் மொழியின் சிறப்புகள், தமிழர் வாழ்வியல், மரபு, பண்பாடு, நாட்டுப்புறக் கலைகள், புகழ்பெற்ற தமிழறிஞர்கள் போன்ற செய்திகள் பாடப்பொருண்மைகளாக உள்ளடக்கப்பட்டுள்ளன.

இகரம் நிலை பாடங்களின் தொடர்ச்சியாகவும், ழகரம் நிலை பாடங்களுக்கான முன் தகுதியாகவும் இப்பாடங்கள் வடிவமைக்கப்பட்டுள்ளன.

LM00 ழகரம் (9 & 10 ஆம் வகுப்புக்கு நிகரானது)

தமிழரின் உயரிய சிந்தனை,  உறவின் மேன்மை,  சமூகப் பொறுப்பு முதலானவற்றை மாணவர்களுக்குக் கற்பிக்கும் நோக்கில் இப்பாடநூல் வடிவமைக்கப்பட்டுள்ளது.

கூடுதலாக, தமிழ் மொழியில் உள்ள தொடர் வகைகள், வல்லினம் மிகும் / மிகா இடங்கள் முதலான இலக்கணங்களை எளிமையாகக் கற்கும் வகையிலும்,  உகரம் நிலை பாடங்களுக்கான தொடர்ச்சியாகவும், சிகரம் நிலை பாடங்களுக்கான முன் தகுதியாகவும் இப்பாடங்கள் உருவாக்கப்பட்டுள்ளன.

CM00 சிகரம் (11 & 12 ஆம் வகுப்புக்கு நிகரானது)

தமிழ் மொழியின் இலக்கண, இலக்கிய வளங்கள் எக்காலத்திற்கும் எவ்விடத்திற்கும் பொருந்தும். இத்தகைய பெருமை வாய்ந்த தமிழ் மொழியின் இலக்கிய கருத்துகள், இலக்கணக் கூறுகள் முதலானவற்றை பாடப்பொருண்மைகளாகக் கொண்டு சிகரம் நிலைக்கான பாடங்கள் உருவாக்கப்பட்டுள்ளன.

மாணவர்களின் படைப்பாற்றல் திறனை ஊக்குவிக்கும் வகையிலும் அவர்களின் படைப்புகளைத் தமிழ் மொழியில் வெளியிட ஆர்வமூட்டும் வகையிலும் பயிற்சிகள் உள்ளடக்கப்பட்டுள்ளன.

மேற்காணும் தமிழ் இணையக் கல்விக்கழகத்தில் வழங்கப்பட்டு வரும் பாடத்திட்டங்கள் பிற மாநிலங்கள் மற்றும் அயல்நாடுகளில் வாழும் தமிழர்கள் இணையம் வழியாக தமிழ் கற்பதற்கு ஏதுவான பாடத்திட்டம் எனப் பள்ளிக் கல்வித் (கஆப) துறை அரசாணை (ப) எண்.254, நாள்.27.12.2024இல் அங்கீகாரம் வழங்கப்பட்டுள்ளது. அரசாணையைக் காண இங்கே சுட்டுக.