23. குறிஞ்சி

	தொடி பழி மறைத்தலின், தோள்உய்ந்தனவே;
	வடிக் கொள் கூழை, ஆயமோடு ஆடலின்,
	இடிப்பு மெய்யது ஒன்று உடைத்தே; கடிக் கொள
	அன்னை காக்கும் தொல் நலம் சிதைய,
5	காண்தொறும் கலுழ்தல் அன்றியும் ஈண்டு நீர்
	முத்துப் படு பரப்பின் கொற்கை முன்துறைச்
	சிறு பாசடைய செப்பு ஊர் நெய்தல்
	தெண் நீர் மலரின் தொலைந்த
	கண்ணே காமம் கரப்பு அரியவ்வே!	உரை

24. பாலை

	'பார் பக வீழ்ந்த வேருடை விழுக்கோட்டு
	உடும்பு அடைந்தன்ன நெடும் பொரி விளவின்,
	ஆட்டு ஒழி பந்தின், கோட்டு மூக்கு இறுபு,
	கம்பலத்தன்ன பைம் பயிர்த் தாஅம்
5	வெள்ளில் வல்சி வேற்று நாட்டு ஆர் இடைச்
	சேறும், நாம்' எனச் சொல்ல-சேயிழை!-
	'நன்று' எனப் புரிந்தோய்; நன்று செய்தனையே;
	செயல்படு மனத்தர் செய்பொருட்கு
	அகல்வர், ஆடவர்; அது அதன் பண்பே.	உரை