(தோத்திரத்திட்டு) என்றும் கூறியிருப்பவை ஈண்டு அறிதற்பாலன, இந்தச் செய்யுளிற் கூறிய இவ் வெண் வகையேயன்றி. நீரை வடிகட்டி உபயோகித்தல், கந்த மூலாதிகளைப்புசியாதிருத்தல், இரவில் உண்ணாதிருத்தல் முதலிய பல சிறந்த அறங்களை இல்லறத்தார்க்கு உரியனவாக ஆகமங்கள் கூறும். அவையும் அறிந்து தெளிக. (17)

(இ-ள்.) கூறின்- (ஒழுக்கத்தா லடையும் பயனைக்) கூறுமிடத்து, கொலையினது இன்மை -  கொல்லாமையாகிய அறம்,  குவலயத்து இறைமை செய்யும் -  நிலவுலகத்து அரசத் தன்மையை நல்கும்:  மலைதல் இல் வாய்மொழி - மாறுபாடு இல்லாத உண்மையானது, வாய்மையார்க்கு - அவ்வுண்மையை யுடையவர்க்கு, மதிப்பை ஆக்கும் - நன்மதிப்பைத் தரும்:  களவின் மீட்சி - (இருவகைக்) கள்ளச் செயலைத் தவிர்தல் (களவின்மை), விலை இல் - விலைமதிக்க முடியாத, பேர் அருளின் மாட்சி விளைப்பது - மிக்க அருட்செல்வத்தை விளைப்பதாகும்:  ஒழிந்தது - ஏனைப் பிறன் மனை நயவாமை, உலைதல் இல் பெருமை - அழிவில்லாத பெருமையையும், திட்பம் - உறுதியையும், உறுவலி - மிக்க வலிமையையும், ஈயம் - நல்கும்.  (எ-று.)

   கொல்லாமை முதலியன நல்கும் நன்மைகளைக் கூறினாரென்க.

   குவலயம் - நிலமாகிய வட்டம்.  மனம் வேறு சொல்வேறு செயல் வேறின்றி நிகழ்தலை, ‘மலைதல் இல் வாய்மை ' என்றார்.