ஆய கலையனைத்தும் ஆய்ந்துணர்ந்து கற்றுவல்ல
தூய சிவ ஞான சுவாமிகள்தாம், --நேயமிகக்
காஞ்சிப் புராணம் கவின்பெருகச் செய்தளித்தார்,
தீஞ்சுவைகள் எல்லாம் செறித்து!

தலச்சிறப்பைச் சாற்றும் புராணங்கள் தம்முள்
கலைச்சிறப்பார் காஞ்சிப் புராணம், --நலச்சிறப்புப்
பற்பலவும் வாய்ந்து, பயில்வார்க் கறிவூற்றாம்!
பொற்புமிக ஓங்கிப் பொலிந்து.

தொட்ட இடந்தோறும் தூயசைவ சித்தாந்த
நுட்பங்கள் தோற்றிஉயர் நோக்கமைந்து, மட்டில்லா
இன்பம் விளைக்கும்! இறையுணர்வில் தோய்விக்கும்!
நன்றுயர்காஞ் சிப்புரா ணம்.

இத்தகைய காஞ்சிப் புராணத்திற் கின்னுரைதான்,
வித்தகன் பொன் சண்முகனாம் மேதகையோன், --முத்தமிழ்தேர்
பொன்குமர சாமி அடிகள் புகழ்ப்புதல்வன்,
நன்குவரைந் தீந்தான்! நயந்து.

தேர்ந்த தமிழ்ப்புலமை, சித்தாந்த நூற்பயிற்சி,
சார்ந்துயர்பண் பெல்லாம், பொன் சண்முகன்தான்-- ஆர்ந்து நின்றான்!
கச்சிஏ கம்பன் கழலிணைகள் போற்றுகின்றேன்.
இச்சிறந்தோன் வாழ்க! இனி தென்று.