இது,  முன்பு  தலைவிக்கு  நிகழ்ந்த  ஆற்றாமையும்  அது  கண்டு  தான் கலங்கியவாறுந் தலைவற்குக்
கூறியது.
  

“மடவ மன்ற தடவு நிலைக்கொன்றை
கல்பிறங் கத்தஞ் சென்றோர் கூறிய
பருவம் வாரா வளவை நெரிதரக்
கொம்புசேர் கொடியிணரூழ்த்த
வம்ப மாரியைக் காரென மதித்தே”¹

(குறுந் - 66)
  

இது, பருவம் அன்றெனப் படைத்து மொழிந்தது.
  

“எனநீ, தெருமரல்வாழி தோழிநங் காதலர்
பொருமுரண் யானையர் போர்மலைந் தெழுந்தவர்
செருமேம் பட்ட வென்றியர்
வருமென வந்தன்றவர் வாய்மொழித்தூதே”²

(கலி - 26)
  

இது தூது வந்தமை தலைவிக்குக் கூறியது.
  

“கைவல் சீறியாழ்ப் பாண நுமரே
செய்த பருவம் வந்து நின்றதுவே
யெம்மி னுணரா ராயினுந் தம்வயிற்
பொய்படு கிளவி நாணலும்
எய்யா ராகுத னோகோ யானே”³

(ஐங்குறு - 472)
  

இது, குறித்த பருவத்துத் தலைவன் வாராதவழித் தூதாய் வந்த பாணற்குத் தோழி கூறியது.  

1. பொருள்:  கற்பாறை விளங்கும்  வழியிற்  சென்ற  காதலர் தாம் மீண்டும் வருவதாகக் கூறிய கார்ப்
பருவம் வாராத போதே புதியதாக  வந்த  மேகத்தைக்  கண்டு கொன்றை மரமானவை கிளைகளைச்
சேர்ந்து கொடியாக மலர்களை விரித்தன. அதனால் அவை மிகவும் மடப்பத்தையுடையனவாம்.  

2. பொருள்: தோழி!    நம்  காதலர் போர் பொரும் வலியுடைய யானையது போரில் சண்டை செய்து
அவர்களது போரில் மேம்பட்ட  வென்றியுடையராய்  வருவர்  எனச்  சொல்லி வந்தது அவர் வாய்
மொழித்தூது. அதனால் நீ வருந்தாதே! வாழி.  

3. பொருள்: கையால்   இயக்குதலில்   வல்ல சிறிய யாழுடைய பாணனே! நம்மவர் குறித்துச் சொன்ன
பருவம்வந்து விட்டது. அவர் வந்திலர்.   எம்மை  நினைந்து வாராராயினும் தம்மிடத்துப் பொய்படும்
சொல் உண்டாதற்கு நாணவும் அறியாதவராகுதலுக்காகயான் மிக வருந்துவேன்.