[பொருள்வகை இதுவெனல்]

இது, பொருள்வகை கூறுகின்றது.

இ--ள் : இன்பமும் துன்பமும் புணர்தலும் பிரிதலும் ஒழுக்கமுமெனப்பட்ட இவை இழுக்காதவாற்றான் இத்திணைக்கு இது பொருளென்று ஆசிரியன் ஓதிய உரிப்பொருளன்றி அவற்றுக்கெல்லாம் பொதுவாகப் புலவனாற் செய்யப்படுவது பொருட் கூறெனப்படும் என்றவாறு.

‘வகை’ என்றதனாற் புலவன் றான் ¹வகைந்ததே பொருளென்று கொள்க. அஃதன்றிச் செய்யுள் செய்தலாகாதென்பது இதன் கருத்து; அவை,

“கைகவியாச் சென்று கண்புதையாக் குறுகிப்
 பிடிக்கை யன்ன பின்னகந் தீண்டித்
 தொடிக்கை தைவரத் தோய்ந்தன்று கொல்லோ
 நாணொடு மிடைந்த கற்பின் வாணுத
 லந்தீங் கிளவிக் குறுமகண்
 மென்றோள் பெறனசைஇச் சென்றவென் னெஞ்சே.”

(அகம் 9)

என்றாற்போலச் செய்யுள் செய்தவன் ²தானே வகுப்பன வெல்லாங் கோடல்; இது பாலைப்பாட்டினுள் வந்ததாயினும் முல்லை முதலாயவற்றுக்கும் பொதுவாமென்பது. பொதுமை யென்பது எல்லா உரிப்பொருட்கும் ஏற்கப் பல்வேறு வகையாற் செய்தல்.

(208)

1. வகைதல்--வகுத்தல்.

2. தானே வகுப்பதென்றது நெஞ்சிற்குத் தீண்டல், தைவரல், தோய்தல் முதலிய தொழிலைச் செய்தல் இல்லையாயினும் உள்ளதுபோல வகுத்துக் கூறுதல்போல்வன. இப்பொருள்போல்வன எல்லாத் திணைக்கும் பொதுவாதலின் ஏனைத் திணைகட்கும் இப்பொருள்போல்வன அமைத்துச் செய்யுள் செய்யலாம் என்றபடி.