எ - து: அங்ஙனங் கடலோடே வருந்திக் கூறினவளுடைய மனங் கலங்கும் வருத்தந்தீரும்படி அவள் காதலர் விரைந்து வரக் கெடுதலரிய காமநோய் நீங்கி, இவளுடைய அழகிய நுதலிற் பசப்பு, அறநெறியறிந்து நடக்குங் கண்ணோட்டமுடையவனை அத்திறமில்லாதார் உண்டாக்கிச் சொன்ன ¹தீயமொழிகளெல்லாம் நன்மக்கள் இருக்கின்ற அவைக்குள்ளே ஆராய்ச்சிப்பட அவைகெட்டாற் போல, இல்லையாகாநின்றது; என்னவியப்போவெனக் கண்டார் கொண்டு கூறிற்றாக உரைக்க. எ - று. 

இது கண்டார்க்கு அவராக்கங் கண்டு மருட்கை பிறந்தது.

²‘மருவழிப் பட்டதென் னெஞ்ச’ என்னுந்துணையுங் கூறத்தகாதன கூறலின் மடனிறந்தவாறும் ‘அறம்புணை யாகலு முண்டு’ எனத் தன்னுடம்பும் உயிரும் வருந்திய நிலைதோன்றக் கூறுதலாற் கலக்மெய்தியவாறுங் காண்க. 

இஃது ‘எங்குந் தெரிந்தது கொள்வே னவனுள் வழி’ என ஐஞ்சீரான் ஒன்றும் ³‘உதுக்காண், தொய்யில் பொறித்த வழி’ என ஓரடியான் ஒன்றும் வருதலிற் கலிவெண்பாவின் வேறுபட்ட பாநிலைவகைக் கொச்சகம். (27) 

(பிரதிபேதம்)¹தீமொழிகள், ²அருவழிப், ³உதுக்காணந் தொய்யில்.