சாரல் - புறவம் - மருதம் - நெய்தல் இவை நானிலப் பகுதிகள்.
செம்மணியும் நறவமும் கயலும் நித்திலமும் முறையே இவற்றிற் படும்
கருப்பொருள்கள். அருவியும் ஆறும் குறிஞ்சியிலும், வாவி மருதத்திலும்
உள்ள நீர்நிலைகள். 6

     (இ-ள்.) வெளிப்படை. குறவர்கள் பல மணிகளையும் அரித்து
எடுத்துப் போக்கிக் காராமணிகளை விதைத்தற்கிடவமான குறிஞ்சி; கறவைக்
கூட்டங்கள் மான்களுடன் பயில்வதற்கிடமாவன காடுகள்; பறவைகள் தாமரை
மலரிலிருந்து கொண்டு இறால் மீன்களை உண்ணுதற்கிடமாவன வயல்கள்;
சுறா மீன்களின் முட்களையுடைய கொம்புகளைத் தெய்வப்படிமமாக வைத்து
விழாக் கொண்டாடுதற்கிடமாவன கழியிடங்கள்.

     (வி-ரை.) குறிஞ்சி - குறிஞ்சி நிலம். குறவர் - குறிஞ்சிநில மக்கள்.
இதை - காராமணி. இதை விளைத்தல் அவர்களது தொழில். மணியரித்து
இதை விளைத்தல் என்பது மணிகள் பரல்போன்று பயிர்
விளைத்தற்கிடையூறான ஆதலின் அவற்றைப் பருக்கைக் கற்களோடொப்ப
அரித்து எடுத்து எறிந்தார்கள் என்னக. பயிர்க்குக் கேடுசெய்வதில்
விலையுயர்ந்த மணிகளும் ஏனைப் பருக்கைக் கற்களும் ஒன்று போலவே
அமைவன; ஆதலின் அரித்து எறிந்தார் எனப்பெற்றது. "நடவந்தவுழவரிது
நடவொணா வகைபரலாய்த் தென்று துன்று, கடல்வந்த சங்கீன்ற முத்துவயற்
கரைகுவிக்குங் கழுமலமே" (மேக - குறிஞ்சி - 8) என்ற ஆளுடைய
பிள்ளையார் தேவாரம் காண்க.

     கறவை ஆனிரை - மான் - முல்லைக் கருப்பொருள். முல்லையின்
மாக்களாகிய ஆனும் (பசு) மானும் ஒருசேரக் கூடிவாழும் இயல்புடையன.
கானம் - காடு. முல்லை நிலப்பகுதி.

     தாமரையிலிருந்து பறவை இற அருந்துவ என்க. அருந்துவ -
உண்பன. உண்பதற்கிடமாவன. பழனம் - வயல். மருதநிலப் பகுதி. இற -
இறால்மீன். இறா என்பது இற என நின்றது.

     கழிச்சூழல் - கழிகள் பரவிச் சூழ்ந்த இடங்கள். கழி - கடல்நீர்
அலைகளினால் உந்தப்பட்டு நிலப்பரப்பினுள் வந்து தங்குமிடங்கள்.
அணங்கயர்தல் - விழாக் கொண்டாடுதல்.

     சுறவ முள் அருப்பு அணங்கயர்தல் - சுறாமீனின் முள்ளையுடைய
எலும்புகளைத் தெய்வத்தின் குறியாக வைத்துத் திருவிழாச் செய்தல் அந்நில
வழக்கு.

     கானம் - முல்லை. பழனம் - வயல் மருதம். கழிச்சூழல் - நெய்தல்.

     இதை, ஆனும் - மானும், இறவு, சுறவு, இவை முறையே குறிஞ்சி
முதலிய நானிலத் திணைக்கும் உரிய கருப்பொருள்களாம். 7

     (இ-ள்.) வெளிப்படை. குலவரையிடங்களில் (மலையிடங்களில்)
மேகங்கள் வானத்தினின்று முத்துக்களைச் சொரிகின்றன; முல்லையின்
அயலிடங்களில்.