கு-ரை: அடல் உள் ஏறு - வெற்றியை உள்ளு (கருது) கின்ற
விடை, வலிமைக்கு ஒப்புறுத்த உள்ளுகின்ற விடையையும் ஆம். ‘ஏறு
போற்பீடுநடை’, பிலிற்றும் - கொப்புளிக்கும்.

     4. பொ-ரை: கயல்மீன்கள் பாய்ந்து விளையாடும் நீரை உடைய
அரிசிலாறு சூழ்ந்ததும், மேகம் தோயும் பொழில்கள் சூழ்ந்ததுமாகிய
திலதைப்பதியில் விளங்கும் அழகிய மதிமுத்தம், கங்கை, பிறை, வன்னி,
எருக்கு, கூவிளம், நாகம் ஆகியவற்றைத் தம் விரிசடையில் வைத்த
விகிர்தனின் இடமாகும்.

     கு-ரை: திருச்சடையில் உள்ளன என்று கங்கை முதலிய ஆறு
கூறப்பட்டன. மங்குல், மேகம்.

     5. பொ-ரை: ஞாழல், கோங்கு, வேங்கை, சுரபுன்னை, கடம்பு,
முல்லை ஆகியன மலரும் பூங்காவை உடைய திலதைப்பதியிலுள்ள
மதிமுத்தம், மணிகள் கட்டிய ஏழு குதிரைகள் பூட்டப்பட்ட கொடித்தேரைச்
செலுத்தும் சூரியன் நின்று வழிபாடு செய்யும் இறைவனது ஊராகும்.