2. பொ-ரை: ஒருபாகத்தே உமையையும், சடையில் நீர் வடிவான
கங்கையையும், கொண்ட அழகிய பெருமான் அமரும் இடம் ஆகிய,
மண்ணுலகத்தோர் நாள்தோறும் வந்து வணங்கி நன்மைகள் பெறும்
நாகேச்சரத்தைக் கண்ணால் காண்பவரே கண்ணுடையராவர்.

     கு-ரை: நன்கு-சிவபுண்ணியம் முதலிய நன்மைகள். கண்ணினால்
என்றது காண்டற்குக் கடவுளையே பொருளாக் கொண்டகண் என்று
அதன் சிறப்புணர்த்த.

     3. பொ-ரை: குறவர் வாழும் குறிஞ்சிப்புனம், முல்லைநிலம்
ஆகியவற்றைக் கொள்ளைகொண்டு மணிகள் குலாவும் நீரைப் பரவச்
செய்யும் காவிரித் தென்கரையில் தேன்மணம் கமழும் பொழில் சூழ்ந்து
அழகியதாய் விளங்கும் நாகேச்சுரத்து இறைவர் பாதங்களைத் தொழுது
ஏத்த வல்லார்க்கு இடர்இல்லை.

     கு-ரை: ஆல-அசைய. அழகாய நாகேச்சுரம். நாகேச்சரத்து அழகர்
(பா. 1.) என்றவற்றால் தலமும் மூர்த்தியும் அழகுடைமை உணர்க.