பதிக வரலாறு:

     பாடிய சமயம் எழுதப்பட்டிலது.

                      பண்: இந்தளம்

                     திருச்சிற்றம்பலம்

     1. பொ-ரை: நீண்டுயர்ந்த சடைமுடிமீது பிறைமதியைச் சூடியவராய்
வேத விதிப்படி வளர்க்கப்பெற்றுச் சுழன்றெரியும் தீயில் ஆடு தலை
விரும்பும் இறைவர் உறையும் அனேகதங்காவதம் என்னும் தலத்தைப்
பாடுதலை விரும்பும் மனத்தினராய பக்தர்கள் வினைகளையும் அவற்றால்
விளையும் பற்றுக்களையும் அறுப்பர்.

     கு-ரை: நீடல்- (நீள் + தல்) நீளல். நீடுமாம், நிமிர்தல் - உயர்தல்.
புன்மை-மென்மை, பொன்மையுமாம், நிலாமுளை - பிறையாகிய முளை.
சூடல் - சூடுதல். மறையின்முறை - வேதவிதி சுலாவு அழல் -
சுழன்றெரியுந்தீ. அழலாடல் - தீயிலாடுதல் அநேகதங்காபதம் -
வடநாட்டிலுள்ள தொருமலை, பாடல் - பாடுதலை. மேவும் - விரும்பும்
வினைபற்று - வினையும் அதனால் வரும் பற்றும். உம்மைத்தொகை.

     2. பொ-ரை: சூலத்தையும் மழுவையும் படைக்கலங்களாகக்
கொண்டு, உலகைச் சூழ்ந்துள்ள ஆழமான கடலில் தோன்றிய விடத்தை
உண்டு உலகைக் காத்தருளிய பெருமான், அனேகதங்காவதத்தில் நீலநிறம்
பொருந்திய பெரிய கண்களையுடைய