கங்கையை மகிழ்வுடன் முடிமிசை வைத்து, திருமால் பிரமர் தேடி
அறியாதவாறு எப்போதும் அவர்களால் அறியப்பெறாதவனாய்
ஒளித்திருக்கும் சிவபிரான் எழுந்தருளியிருக்கும் ஊர் கருப்பறியலூர்.

     கு-ரை: நிரந்து-வரிசையாக. பரந்து-பரவி. சடைமேல் மிசை-சடையினது
மேலிடத்தில். நிரந்தரம்-எப்போதும். நேடி-தேடி. கரந்தவன்-ஒளித்தவன்.

    10.  பொ-ரை: மறைக்கவேண்டிய உறுப்பை மறையாது
ஆடையின்றித் திரியும் சமணர்களும், அறிவற்ற புத்தர்களும் சொல்லும்
திறன் அறியாதவர்கள். அவர்கள் சொல்லை விடுத்துக் குற்றம் அறியாத
பெருமான் கொகுடிக் கோயிலையே உறுதியானதாகக் கருதி எழுந்தருளிய
ஊர் கருப்பறியலூர்.

     கு-ரை: அற்றம் மறையா அமணர்-மறைக்கவேண்டிய உறுப்புக்களை
மறைக்காத சமணர். ‘அற்றம் மறைப்பதுமுன் பணியே’ என்ற துணர்க.
சொற்றம்-சொல்லும் சொற்கள். சொல்+து+அம். கொகுடி-ஒருவகை முல்லை.
குற்றமறியாத பெருமான்-இத்தலத்துப் பெருமான் திருப் பெயர்.
கற்றென-நிலையாக. கல்+து-கற்று. கல்லைப் போன்று உறுதியானது.

     11. பொ-ரை: நன்மைகளைத்தரும் நீர் வளம் மிக்க புகலிப் பதியில்
தோன்றிய ஞானசம்பந்தன், தன்னோடு உடன் கலந்தவனாய கருப்பறியலில்
மேவிய கடவுளைப்பாடிய பயன்தரும் தமிழ்ச் செய்யுளாகிய
இப்பதிகப்பாடல்கள் பத்தையும் கற்று வன்மை உற்றோர்க்கு வினைகள்
வாடுதல் எளிதாம்.