திருச்சிற்றம்பலம்

     11. பொ-ரை: தன்னை அடைந்த அன்பர்க்கு இன்பங்கள்
தருபவனும் மெய்ப்பொருளாக விளங்குவோனும், கல்லாலியன்ற மதில்
சூழ்ந்த பிரமபுரத்துள் விளங்கிக் காப்பவனும் ஆகிய பெருமானின் அருளை
மிக இளைய காலத்திலேயே பெற்ற ஞானசம்பந்தன் பாடிய இத்திருப்பதிகப்
பாடல்கள் பத்தையும் ஓதவல்லவர்கள், பொன்னையும் போகங்கள்
பலவற்றையும் அடைந்த புண்ணியர் ஆவர்.

     கு-ரை: தன் அடைந்தார்க்கு-தன்னை அடைந்த அன்பர்க்கும்
அறிவர்க்கும். இன்பங்கள்-பெத்தத்திலுள்ள சிற்றின்பங்களும் முத்திப்
பேரின்பமும். தத்துவன்-மெய்ப்பொருள். கன்-கல் (அடைந்த மதில்).
முன்-முற்பிறப்பு, இளமை, சந்நிதி, தந்தைமுதலியோர் எதிர்
என்றபொருளும் குறித்து நிற்றலறிக. வல்லார் எழுவாய். அடைந்தார்
இரண்டும் வினைப்பயனில்லை, புண்ணியர் பெயர்ப்பயனிலை உம்மை
கொடுத்து ஆக்கம் (ஆவர்) வருவித்து முடித்தலுமாம்.