5. பொ-ரை:வேதகீதங்களை மிகுதியாகப் பாடும் அடியார்கள்
கூடியிருந்து திருவடிகளைத் தொழுமாறு விளங்கி நிற்கும் ஒளி வடிவினனும்,
வெண்மணலைச் சிவலிங்கமாகத் திரட்டி வேதமந்திரங்களை ஓதி சடாயுவால்
ஞானத்தோடு வழிபடப்பட்டவனுமாகிய சிவபிரான் எழுந்தருளிய இடம்
புள்ளிருக்குவேளூர்.

     கு-ரை:கீதம்-பாட்டு. மணம் ஒன்றி உரை ஆர்கீதம் பாடநல்ல
உலப்புஇல் அருள் செய்தார். (தி.1.ப.71.பா.8) அடியார்கட்குப் பாதமே குடி.
குடியாகத் தொழ நின்ற சோதி என்க. பரஞ்சோதி - மெய்யொளி, மணலைச்
சிவமாகப் போதத்தால் பாவித்து வேத மந்திரத்தால் வழி பட்டவன் சம்பாதி.
போதம்-ஞானம்.

     6. பொ-ரை:சைவத்திறம் மேற்கொண்ட அடியவர்மீது
தீவினைகளால் வரும் துன்பங்கள் வாராமே செய்பவனும்,
சிவதன்மங்களாகிய அறநெறிகளை ஆலின் கீழ் இருந்து அருளியவனும்
தனது வீரத்தையே பெரிதெனக்கருதி வந்த இராவணனை மறத்தொடு
போரிட்டுப் புறங்கண்ட சடாயுவால் வழிபடப்பட்டவனுமாகிய சிவபிரான்
அமரும் இடம் புள்ளிருக்குவேளூர்.