பதிக வரலாறு:

     சண்பைநகர் வேந்தர் சொல்வேந்தரொடு திருவாஞ்சியத்தில்
திருநீலகண்டப் பெருமானை வணங்கினார். தலையாலங்காடு முதலிய
தலங்களையும் பணிந்தார். திருவாரூர் சென்றார். திருக்காறாயில், தேவூர்,
திருநெல்லிக்கா என்னும் தலங்களை வழிபட்டுத் திருக்கைச்சினத்தைப்
பரவிப் பாடியதிருப்பதிகம் இது.

பண்: சீகாமரம்

திருச்சிற்றம்பலம்

     1. பொ-ரை: மாதொருபாகனும், குளிர்ந்த பிறைமதி சூடிய
செஞ்சடையினனும் கருமை விரவிய நீலமணி மிடற்றானும்,
வேதப்பாடல்களைப் பாடுவோனும், நெய் பூசப் பெற்ற மூவிலை
வடிவமான சூலத்தை ஏந்திப் பெருகி ஒளிர்கின்ற கையை உடையோனும்
ஆகிய சிவபிரான் மேவி உறையும் கோயில் கைச்சினமாகும்.

     கு-ரை: தையல்-உமாதேவியார். கூறு-இடப்பாகம். மை-மேகம்.
உலாம்-ஒத்த. நிவந்து-மேலோங்கி. ஒளி-தீ. கைச்சினம்-இந்திரனது
கைச்சின்னம் (குறி). சிவபிரான் திருமேனியில் பட்டது பற்றிய
காரணப்பெயர். 1.2.3.6. ஆம் பாடல்களில் உணர்த்திய மறைப் பாடல்
இத்தலத்தின் விசேடமாதலறியலாம்.