கு-ரை: துஞ்சிருள்வன்னி:- வன்னிமரத்தின் இலைகள் மிகுந்தும்
அடர்ந்தும் தழைத்திருத்தலால் இருள் துஞ்சும் நிலையினது. உளத்திற்கு
ஏற்றினும் அமையும்.

     6. பொ-ரை: ஒளியும் வரியும் பொருந்திய புலித்தேலாடையை
உடுத்து வரிந்து கட்டிய கோவண ஆடையராய் உள்ள பெருமானார்
உமையம்மையாரோடும் உடனாய் அன்றலர்ந்த மலர்கள், வன்னி,
கொன்றை, கங்கை ஆகியவற்றை முடிமிசைச் சூடிவந்து என் உளத்தின்
கண் புகுந்துள்ள காரணத்தால் வலியகுரங்கு, புலி., கொலையானை, பன்றி,
கொடிய பாம்பு, கரடி, சிங்கம் ஆகியன நமக்கு நல்லனவே செய்யும்!
அடியார் கட்கும் மிக நல்லனவே செய்யும்.

     கு-ரை: வரி-கீற்றுக்களை உடைய புலியினது. வாள்வரி:-
அன்மொழித்தொகை. கோள்-வலிமை. அரி-குரங்கு. கோளு (வலிமை,
கொலையு)ம் அரி(-பகை)யும் உடைய உழுவை (-புலி) எனலுமாம்.
ஆளரி-சிங்கம். ‘ஆளரியேறனையான்’ (பெரிய. திருஞான. 474).