அந்தணனாகிய இறைவன் திருவடிகளை ஏத்தும் அருமறைவல்ல
ஞானசம்பந்தன் பாடிய சந்தம் பொருந்திய அழகிய இத்தமிழ் மாலையை
ஓதிப் பரவ வல்லவர், வினைகள் கெட முற்படச் சென்று வானவர்களோடு
அவர்கள் உலகில் புகவல்லவர் ஆவர்.

     கு-ரை: அந்தணன்-தோணியப்பர். ‘அறவாழி அந்தணன்’
‘அந்தணர் என்போர் அறவோர்’ ‘அந்தணர் நூல்’ என்பவற்றால்
திருவள்ளுவர் குறிக்கும் பொருளை உணர்க. அருமறை ஞானசம்பந்தன்:-
மறையின் அருமையும், அம்மறையால் எய்தும் ஞானமும், அந்தஞானத்தொடு
தமக்குள்ள சம்பந்தமும் உணர்த்திப் பெயர்க்காரணம் புலப்படுத்தியவாறு.
இத்திருப்பதிகம் சந்தம் நிறைந்தும் அழகுடையதாயும் உள்ள தமிழ் மாலை.
அழகு-சொல்லழகு. பொருளழகு, தொடையழகு, திருவருட்பொலிவு.
வினைகெடமுனை (முன்பு) புகவல்லவர் என்க.