வினோத விடைகள்

மிருக ராஜன் தலையில் ரோமம் 
   அடர்ந்தி ருப்பதேன்? - காட்டில் 
வெட்டி விடவே எந்த ஆளும் 
   இல்லை யாதலால்!

ஒட்டைச் சிவிங்கிக் கழுத்து மிகவும் 
   நெட்டை யானதேன்? - அது 
எட்டி எட்டி இலையும் தழையும் 
   பறித்துத் தின்றதால்!

வரிக் குதிரையின் உடம்பு முழுதும் 
   கோடி ருப்பதேன்? யாரோ
வலிக்க வலிக்கச் சவுக்கி னாலே 
   அடித்த காயம்தான்!

அண்டங் காக்கை அதிக மாகக்
   கறுத்துப் போனதேன்? - அது 
அடுப்புக் கரியைத் திருட்டுத் தனமாய்
   எடுத்துத் தின்றதால்!