வெள்ளை

உன்றன் நினைவால் ஓடி வந்தேன்
இரண்டு நாள்முன் இரிசன் வந்து
மாப்பிள்ளை பார்த்தான் மகிழ்ச்சி கொண்டான்
திருமணத்தின் தேதி குறிக்க
வருவது போல வந்தேன் இங்கே,
மண்ணாங் கட்டியும் வருவேன் என்றாள்
தட்டிக் கழித்துநான் தனியே வந்தேன்

அம்மா

இன்று நீங்கள் இங்கு வராவிடில்
என்றன் உயிரே ஏகி இருக்கும்
பிரிந்து சென்றீர்! பிசைந்த சோற்றைக்
கையால் அள்ளினால் வாயோ கசக்கும்
பச்சைத் தண்ணீர் பருகி யறியேன்.
ஏக்கம் இருக்கையில் தூக்க மாவரும்?
பூனை உருட்டும் பானையை அவ்வொலி
நீங்கள் வரும்ஒலி என்று நினைப்பேன்,
தெருநாய் குறைக்கும் வருகின் றாரோ
என்று நினைப்பேன் ஏமாந்து போவேன்
கழுதை கத்தும்; கனைத்தீர் என்று
எழுந்து செல்வேன் ஏமாந்து நிற்பேன்
உம்மைஎப் போதும் உள்ளத்தில் வைத்தால்
அம்மியும் நீங்கள் அடுப்பும் நீங்கள்
சட்டியும் நீங்கள் பானையும் நீங்கள்
வீடும் நீங்கள் மாடும் நீங்கள்
திகைப் படைந்து தெருவிற் போனால்
மரமும் நீங்கள் மட்டையும் நீங்கள்
கழுதை நீங்கள் குதிரை நீங்கள்
எல்லாம் நீங்களாய் எனக்குத் தோன்றும்
இனிமேல் நொடியும் என்னை விட்டுப்
பிரிந்தால் என்னுயிர் பிரிந்து போகும்.

வெள்ளை ; இரிசனார் வீட்டில் இருக்கின்றாரா?

இரிசன் ; உள்ளே வருவீர் வெள்ளையப்பரே?
எப்போது வந்தீர்? இப்போது தானா?
மனைவியார் உம்முடன் வந்திட வில்லையா?
நல்லமுத்து நலமா? அமர்க.

வெள்ளை ; மனைவி வயிற்று வலியோடிருந்தாள்
பையன் நிலையைப் பகரவந்தேன்.
திருமணம் வேண்டாம் என்று செப்பினான்

இரிசன் ; வெளியிற் சொன்னால் வெட்கக் கேடு
வெள்ளை யப்பரே வெந்தது நெஞ்சம்
பேச்சை நம்பி ஏச்சுப் பெற்றேன்
திருமணம் விரைவில் செய்ய எண்ணி
எல்லாம் செய்தேன் எவர்க்கும் சொன்னேன்
என்னை ஊரார் என்ன நினைப்பார்?
எப்படி வெளியில் இனிமேற் செல்வேன்?
மணம்வேண்டாமென மறுத்ததெற்கு?
அடங்கி நடப்பவன் அல்லவா உன்மகன்?
நல்லமுத்தா சொல்லைத் தட்டுவான்?
சொல்வது தானே நல்லமுத்துக்கு?

வெள்ளை ; நூறு தடவை கூறிப்பார்த்தேன்
வேண்டாம் மணமென விளம்பி விட்டான்.
மனம் புண்பட்டு வந்தேனிங்கே
அம்மாக் கண்ணுவின் அழகு மகனுக்குத்
தங்கள் பெண்ணைத் தருவது நல்லது.
வைத்த ,நாளில் மணத்தை முடிக்கலாம்
என்னசொல் கின்றீர் இரிசப்பனாரே?

இரிசப்பன் ; அம்மாக் கண்ணை அறிவேன் நானும்
வெள்ளை யப்பரே வீண்பேச்செதற்கு?
நீவிர் விரைவாய் நீட்டுவீர் நடையை

( 195 )





( 200 )








( 205 )








( 210 )




( 215 )





( 220 )




( 225 )




( 230 )








( 235 )









( 240 )









( 245 )