:: TVU ::

எழிலியின் வரலாறறிந்த காதை

பக்கம் : 115


	கூத்தன் ஒரு தீவை அடைதல்

	கண்டவர் புகழ்ந்து கைப்பொருள் நல்கப் புகழும் பொருளும் மிகவரப் பெற்றே அகநிறை களிப்பால் ஆழ்கடல் மிசையே
	மீள்வோன், பெருவளி மிடல்கொடு தாக்க	50
	நீள்கலம் உடைந்து நெடுங்கடல் மூழ்கலும்; பாய்மரம் சிதறிய பகுமரம் பற்றி ஓய்விலா அலைகள் உந்தி உதைப்பக் கடுங்கண் மறவர் கல்லா மாந்தர்
	கொடுங்கள் உண்டியர் குழீஇ வாழும்	55
	மொழிபெயர் தீவின் கழிபடு கரையில் விளிவில னாகிச் சார்ந்தனன் கூத்தன்;

	எழிலியின் கையறுநிலை

	`பெயருங் கூத்தன் பெருவளி தன்னால் உயர்கலம் மூழ்கி உயிர்துறந் தான்'என
	உயிர்பிழைத் துய்ந்தோர் வந்தீங் குரைத்த	60
	கொடுமொழி செவிப்படக் கொடுவரிப் புலிவாய்ப் படுதுயர் மானெனப் பதைத்தனள், கதறினள்; துடித்தனள், துவண்டனள், துடியிடை கண்ணீர் வடித்தனள், `என்னுடை வாழ்வில் வீசிய
	பெரும்புயல் விளைத்த துயரம் பெரிதே!	65
	மாலுமி இல்லா மரக்கலம் ஆகிப் பாழும் இடர்க்கடல் வீழும் தனியேன் எவ்வணம் உய்குவென்? யாதுநான் செய்குவென்? கவ்விய இத்துயர் கடப்பது யாங்ஙனம்?
---------------------------------------------------------------
	பெருவளி - புயல், மிடல் - வலிமை, கலம் - மரக்கலம், பகுமரம் - மரத்துண்டு, உண்டியர் - உணவினர், குழீஇ - கூடி, மொழிபெயர் - மொழிமாறிய, கழி - உப்பங்கழி, விளிவிலன் - இறக்காதவன், கொடுவரி - வளைகோடு, கவ்விய - பற்றிய.