:: TVU ::

எழிலியின் வரலாறறிந்த காதை

பக்கம் : 119


	கொல்லும் நோக்கொடு குழுமிய சிற்றினம் ஒல்லும் வகையாற் பல்வகைப் பழியைச் சொல்லித் தீர்த்தது சூழ்ச்சிகள் விளைத்தது; சூழ்ச்சியால் அயன்மொழி ஆட்சியைப் பரப்பிடப்
	பாழ்ச்செயல் புரிந்தது; பகைமனங் கொண்டெமைக்	150
	குறுமனம் என்று குறைகள் சொற்றது; பிறமொழி வெறுக்கும் பெற்றியர் என்றது; உடனிருந் தழிக்கும் நோய்நிகர் மாந்தர் கொடுமனம் உடையோர் விடுபொய் மொழியை
	நண்ப! மெய்யென நம்பேல்; எம்முயர்	155
	பண்பினை நடுநிலைப் பாங்கினர் ஏத்துவர்' எனஅக் கூத்தன் எடுத்தியம் பின்னால்;

	தலைவன் மகிழ்வும் வேண்டுகோளும்

	மனமிகக் களித்த பழுவூர்த் தலைவன் கூத்தன் உரைத்திடும் கொள்கைகள் போற்றி
	`நாத்துணை யாகிய நாவல! ஈங்கிவண்	160
	காத்துனைப் போற்றிடக் கருதினம்; எம்முழைச் சின்னாள் வதிந்து சிறியேம் மகிழ நன்னூல் ஒன்றின் நலமுரைத் தேகுதி! கூத்தின் திறமெலாம் பார்த்திடும் விழைவினேம்
	ஆயினும் நின்குழு அனைத்தும் இழந்து	165
	பாய்மரம் துணையாப் பற்றிவந் துற்றனை; ஆதலின் நன்னூல் அறநூல் ஒன்றினை ஓதுதி எமக்கு'என உரைத்தன னாகக்

	கூத்தன் திருக்குறள் உரைத்தல்

	கூத்தனும் இசைந்து குலவி மகிழ்ந்தனன்;
	பாத்திறம் காட்டும் பாவலன், நாவலன்,	170
---------------------------------------------------------------
	சொற்றது - சொல்லியது, எம்முழை - எம்மிடம், பாத்திறம் - பாடல் திறம்.