:: TVU ::

கோமகன் கொலையுறு காதை

பக்கம் : 173


	விழுமவன் தானும் வேங்கையிற் சீறி
	எழுதரக் கனன்றுடன் இருவரும் பொருதனர்;	205
	அழிவது யாரென அறியா வகையிற் புழுதியிற் புரண்டனர் புழுங்கினர் அழுங்கினர்;

	துருவன் கொலை செய்யச் சண்டிலி கதறல்

	கழிமிகு காமங் கனன்றெழு மார்பிற் குழிபட ஓச்சிக் கொடுவாள் செலுத்திப்
	பறித்தனன் துருவன்; பறித்தஅவ் வாள்நுனி	210
	கண்ணீர்த் துளியெனச் செந்நீர்த் துளிகளை மண்ணிற் கிடந்தோன் மார்பினிற் சிந்த, விரிபடு மார்பில் வேட்கைப் பெருக்கெனக் குருதிப் பெரும்புனல் கொப்பளித் ததுவே;
	அந்நிலை காண அஞ்சிய மெல்லியல்	215
	நன்மலர்க் கையால் தன்முகம் புதைத்துக் கூஉய் அழுதனள், கொடுமை என்றனள், ஆஅய்புலம் இன்றி அடாஅது செய்தனை! எனப்பல கூறி இரைந்தனள் இரங்கினள்;
	மனத்திகில் கொண்ட மணாளன் மலைத்தனன்;	220

	கோமகன் முடிவும் - துருவன் ஓடிமறைதலும்

	செந்நீர்க் காட்டிற் சீரழிந்து கிடப்போன் புண்ணீர் வடிந்து பொங்கிய வாயிதழ் பூஉங்ங் கொடிஎனப் பூஉங்ங் கொடியெனக் கூஉம்பி யசைந்தன, குளிர்ந்ததவ் வுடலம்;
	தேஎம்பி யழுதன திங்களும் வானமும்;	225
	ஐயமுஞ் சீற்றமும் ஆட்கொண் டமையால் வெய்யவ னாகி வீண்கொலை புரிந்து செய்வதொன் றறியாது திகைத்திடுந் துருவன் பெய்வளை யாளொடும் உய்வகை கருதிக்
	காணா தேகிக் கரந்தனன் விரைந்தே.	230
---------------------------------------------------------------
	ஆஅய்புலம் - ஆராயும் அறிவு, அடாஅது - தகாதது, பூஉங்ங் கொடி - பூங்கொடி, கூஉம்பி - குவித்து, தேஎம்பி - தேம்பி.