பிற மாநிலங்களிலே...

     "வள்ளத்தோல்"  என்றழைக்கப்படும் நாராயண மேனன் (1878 - 1958)
என்பார்,  கேரளத்தில்  மலபார் மாவட்டத்தில் மங்கலம் என்னும் சிற்றூரில்
பிறந்தவர்.  இவர்,   தலைசிறந்த    காந்தியவாதி.  கேரளத்தின்  தேசியக்
கவிஞராகப்  போற்றப்படும்  இவர்,  தாம்  வாழ்ந்த காலத்திலேயே கேரள
மக்களாலும், சுதந்திரத்திற்குப்பின் அமைந்த மாநில - மத்திய அரசுகளாலும்
நன்கு போற்றப் பெற்றார்.

     'சித்திர யோகம்'  என்ற  மகா  காவியத்தை  மலையாள  மொழியில்
படைத்தார்.  வால்மீகி  இராமாயணத்தை  மலையாள  மொழியில்  கவிதை
நடையில்  மொழி  பெயர்த்தார். இவருடைய சிறிய காவியங்களனைத்தும் 9
தொகுதிகளாக  வெளியிடப் பட்டுள்ளன.  இவர்,  'கேரள  கலா மண்டலம்'
அமைத்து, அதன்  மூலம் கேரளத்தின் சிறப்புமிக்க கலையான 'கதகளி'யை
உலகிலுள்ள முக்கிய நாடுகளிலெல்லாம் பரவச் செய்தார். மலையாள மொழி
வளர்ச்சிக்குப்  பாடுபட்ட  தேசியவாதிகளிலே  வள்ளத்தோல்   முதன்மை
பெற்று விளங்குகின்றார்,

     வடபுலத்துப் பெருந்தலைவர்களிலேயும் சிலர் தத்தம் தாய் மொழியில்
கவிதை புனையும் ஆற்றலைப் பெற்றிருந்தனர் என அறிகிறோம்.