ஒரு  சிலரின்  தனிவுடைமையாக   இருந்த   பாரதியார்   பாடல்கள்
தி.க.சண்முகம்  அவர்கள்  முயற்சியால்தான்  நாட்டின்  பொதுவுடமையாயின.
இவர்,  தமிழிலே ஆழ்ந்த பற்றும் பயிற்சியுமுடையவர். தம் குழுவின் சார்பில்
நடத்திய நாடகங்களிலேயும் பாரதியார் பாடல்களைப் பயன்படுத்தியுள்ளார்.

      தமிழ் மொழியை  வளர்ப்பதனையும்,  தமிழினத்தின் தனி நலன்களைக்
காப்பதனையும்   குறிக்கோள்களாகக் கொண்டு,  அவற்றோடு  பாரத  தேசிய
ஒருமைப்பாட்டினைக்  காக்கும்  பணியினையும்  பிணைத்துச்செயலாற்றும் ஒரு
நாடகக்  குழு   இன்று   தமிழகத்தில்   உண்டென்றால்,   அது, டி.கே.எஸ்.
சகோதரர்களின் நாடகக் குழுவேயாகும்.

     இந்தக்   குழுவினர்,   தாங்கள்   நடத்தும்   ஒவ்வொரு  நாடகத்தின்
துவக்கத்திலே,  "வாழிய   தமிழன்னை வாழ்கவே"  என்ற  யோகிசுத்தனாந்த
பாரதியாரின்  தமிழ்த்தாய்  வாழ்த்தும்,   இறுதியிலே  பாரதியாரின்   'வாழ்க
நிரந்தரம்' என்ற வாழ்த்தும் பாடி வருகின்றனர்.

     மன்னார்குடி  எம்.ஜி.நடராசப்  பிள்ளை, கடந்த  தலைமுறையின்  மிகச்
சிறந்த நடிகராவார்.  இவர்,  மன்னார்குடி   நகரமன்றத்தின்  அங்கத்தினராக
இருந்து, நடிகர் குலத்துக்குப் பெருமை தேடினார். காங்கிரஸ் கமிட்டிகளிலேயும்
அங்கம் வகித்தார். அந்நாளில், விடுதலைப்போரில் ஈடுபட்டுச்  சிறை செல்லும்
பேறுபெற்ற நடிகர்கள் மிகச் சிலரே யாவர்.  அவர்களிலே இவர்  முதல்வராக
விளங்கினார். இவர், கதாநாயகனாவே நடித்துப் புகழ் பெற்றார். இவருடன் பல