டைரக்டர் கே. சுப்பிரமணியம்,  தமிழ்மொழியிடத்தும் அம்மொழிவழித்
தோன்றிய   கலைகளிடத்தும்   கரைகாணாக்  காதலுடையவர்.   இவருடைய
மனைவி,  மக்கள்,  மருமக்கள்  ஆகிய அனைவருமே முத்தமிழ்ப் பணியிலே
ஈடுபட்டுள்ளனர்.   இவர்கள்   அயல்  நாடுகளுக்கெல்லாம்   சென்று  தமிழ்
மொழிக்கும் தமிழகத்துக் கலைகளுக்கும் பெரும்புகழ் சேர்த்துள்ளனர்.

     திரு. எஸ்.சௌந்தரராசன்  என்பவர்,  சிறந்த  தேசியவாதி.   சென்னை
மாவட்ட  காங்கிரஸ்  குழுவின்  அங்கத்தினராக  இருந்தவர்.  இவர்,  1934ல்
'தமிழ்நாடு  டாக்கீஸ்'  என்ற  ஒரு  நிறுவனம்  கண்டு,  அதன்  சார்பில் பல
திரைப்படங்கள் எடுத்தார். 1945ல் திரைப்படத் தூதுக்குழு  ஒன்றுடன் சேர்ந்து
பிரிட்டன், அமெரிக்கா ஆகிய நாடுகளுக்குச் சென்று திரும்பினார்.

      'தென்னிந்தியத்   திரைப்பட   வர்த்தகர்  சங்கம்'  (சௌத்  இந்தியன்
பிலிம்சேம்பர்  ஆப் காமர்ஸ்) என்ற நிறுவனத்தைத் தோற்றுவித்த எழுவரிலே
திருவாளர்கள்     டைரக்டர்    கே.சுப்பிரமணியம்     எஸ்.சௌந்தரராசன்,
சி.எஸ்.வி.  ஐயர்  ஆகியோர்  மிகச் சிறந்த தேசியவாதிகளாவர். இதன் முதல்
தலைவர்  நாவலர்  எஸ். சத்தியமூர்த்தி  ஆவார்.  1939  முதல்  1941 வரை
ஐயரவர்களே இதன் தலைவராக இருந்து வந்தார்.

     பின்னர், திருவாளர்கள்  டைரக்டர் கே.சுப்பிரமணியம், எஸ்.எஸ்.வாசன்
ஆகிய தேசியவாதிகள் தலைவர் பதவியை அடைந்துள்ளனர்.