அந்நாளில்  விடுதலைக்  கிளர்ச்சி  பற்றிய நூல்களை  வெளியிடுவதற்கு
அதிகப்படியான  துணிவு  தேவைப்பட்டது.  சிறை செல்லவும் கைப்பொருளை
இழக்கவும்      துணிவு       பெற்றவர்களே,      தேசிய     எழுச்சியை
எதிரொலிக்கின்ற - தேசியவாதிகளால்  எழுதப்படுகின்ற  நூல்களை வெளியிட
முன்வந்தனர்.   ஏதேனுமொரு   நூலை   சட்ட  விரோதமானதென்று  அரசு
கருதிவிட்டால்,  அதனை  எழுதிய  ஆசிரியர்,  வெளியிட்ட   பதிப்பகத்தார்,
அச்சடித்துக்  கொடுத்த  அச்சகத்தார் ஆகிய அத்தனை பேர்மீதும் வழக்குத்
தொடுத்து, அவர்களைத் தொல்லைப்படுத்துவது வழக்கமாக இருந்தது.²

     'பூட்டை    உடையுங்கள்'    என்ற   பெயரில்   'தமிழ்ப்   பண்ணை'
வெளியிட்டிருந்த  ஒரு  நூலை ஆட்சேபகரமானதென்று அறிவித்து, ஆசிரியர்
திரு . இராமரத்தினம்          அவர்களையும்,         வெளியிட்டவரான,
திரு . சின்ன  அண்ணாமலையையும்  அரசு  சிறையில்  தள்ளியது.  இப்படி,
இன்னும்     எத்தனை    எத்தனையோ     கொடுமைகள்!     இத்தனைக்
கொடுமைகளையும்   தாங்கிக்கொண்டு   தான்  விடுதலைப்போர்க்களத்திலே
தமிழ்மொழிக்கு வாழ்வு தேடினர், தேசிய வாதிகள்.

     இப்படி,    மொழித்துறையில்   தேசியவாதிகள்   நிகழ்த்திய   பெரும்
புரட்சியை-ஆங்கில   ஆதிக்கத்தை   அழித்தொழிக்க   நடத்திய   அறிவுப்
போராட்டத்தை  ஒரு  மாகாப்பியமாகவே   எழுதலாம்.   ஆனால்,  அதற்கு
மகாகவி கம்பர்தான் மீண்டும் வரவேண்டும்.